د افغان سولې خبرې په دې حساسه مرحله کې په ټپه دریدلې بلل کیږي،چې ورسره جوخت د جمهوریت په چوکاټ کې یو شمېر کسان د طالبانو پر وړاندې د دریدو خبره کوي.
ویل کېږي،دوستم، عطا محمد نور او محمد محقق هغه کسان دي،چې اوس یې په ښکاره د سولې له شورا یې مخ اړولی او په خپلو او د ځینو هېوادونو په امکاناتو یې د طالبانو پر وړاندې د جګړې اعلان کړی دی.
د سیاسي چارو یو شمېر شنونکي وايي، په اوسني نازک حالت کې دا ډول تحرکات د اوس او راتلونکې په تاوان دي.
د سیاسي چارو شنوونکی شهزاده مسعود وايي: « هر هغه څوک چې پر جګړې ټېنګار کوي یا له نورو د دې له پاره وسلې اخلي، چې جګړې ته به دوام ورکړي. دا د ملت د ارادې خلاف حرکت دی. زه هېله لرم،چې مقابل لوری به هم داسې کاذب فکر ونه کړي، چې د جګړې له لارې به اقتدار ته ورسېږي.»
د سولې خبرې اوس مړې ښکاري او په ټولو خواوو کې هغه پخوانی شور نشته،چې په کم وخت کې د مذاکراتو د بریا او سیاسي تفاهم د رامنځته کېدو خبره کېدله.
باور دادی، چې اوسنی سیاسي او نظامي وضعه په بد حالت کې ده،چې حل یې په تدبیر کیږي.
د پوځي چارو شنوونکی اسدالله ندیم وايي: « په افغانستان کې سیاسي او امنیتي وضعه په بد حالت کې ده. که څېرې په سمه بڼه تدابېر ونه نېول شي،ښايي حالت تر دې هم بدتر شي. په اوسني وخت سیاسي مشران او هغه کسان چې په ټولنه کې نفوس لري، باید سره یو شي.»
یوازې دا څو محدود کسان نه دي،چې په بې مسولیتۍ کې د جګړو شخصي جبهې یې جوړې کړې، تر څنګ یې یو شمېر نور کسانو هم ګوتڅنډنه کړې،که سیاسي تفاهم رامنځته نه شي، دوی به د ځان د دفاع لپاره لاس په مقاومت پورې کړي.
د ولسي جرګې غړی ګل احمد کمین وايي: « متاسفانه د دې کسانو ګټې تل په جګړه کې دي. که چېرې جګړه نه وي، بیا دوی ته څوک مراجعه نه کوي، تجارتي چارې یې مخ ته نه ځي او عواید نه لري. د دوی ټول عواید د جګړې له لارې دي. »
د حکومت او طالبانو تر څنګ د ځینو اشخاصو له خوا داسې مهال په جګړو تکیه کیږي،چې د سولې خبرې په بن بنست حالت کې دي.
امریکا او ناټو د خپلو ځواکونو د وروستۍ جوپې په وتلو بوخت دي،چې دې مسایلو د افغانستان اوسنی او راتلونکی له مبهم حالت سره مخ کړی دی.