د اسرائیل پارلمان نوي ائتلافي حکومت ته د باور رایه ورکړه او د بنيا مين نتنیاهو ۱۲ کلنه واکمني يې رسما پای ته ورسوله.
د نوي لومړي وزير په ټاکل کېدو سره اسرایيلو کې هغه سياسي کړکېچ پای ته ورسېد، چې د څلورو انتخاباتو لامل شوی و.
د اسرایيل پارلمان دغه رايه اچونه پرون ورځ تر سره کړه او په پايله کې يې د مخکيني لومړي وزير سلاکار او سخت دريځه ملت پال ګوند مشر نفتالي بنيت لومړی وزير وټاکل شو.
نفتالي ويلي، چې د نوي ائتلافي حکومت رامنځته کېدل د هېواد د کړکېچن حالت پای ته رسولو په موخه يوه اړتيا وه.
نوي لومړي وزير پر خلکو غږ کړی، چې د هېواد د روانو حالاتو د ښه مدیريت برخه کې ورسره همکاري وکړي.
بلخوا راپورونه وايي، بنيا مين نتنیاهو لا هم په پارلمان کې د اسراییل تر ټولو د ستر ګوند مشري کوي او تمه کیږي، چې د نوي ائتلافي حکومت جوړېدو سره به جدي مخالت وکړي.