د قطر پلازمېنه په دوحه کې څو ځلې د بین الافغاني خبرو د پیل راپورونه خپاره شول،خو له اختر وروسته تر اوسه پورې ګټورې خبرې نه دي شوي او د دواړو خواوو له لوري د شویو ناستو موضوعات فرعي ښودل کیږي.
ازاد خبریال سمیع یوسفزی وايي: « په قطر کې د بین الافغاني مذاکراتو د نه پرمختګ لاملونه څرګند دي. هغه دا دي، چې پر بنسټیزو خبرو باندې پرمختګ نه دی شوی او نه هم پرې هوکړه شوې. داسې نه برېښي،چې دواړه غاړې او په ځانګړي ډول طالبان له وروستیو پوځي پرمختګونو وروسته د سولې خبرو ته خاصه لېوالتیا نه ښي.»
لس میاشتې وړاندې دغه خبرې پیل شوي،خو لاهم په داسې موضوعاتو هوکړه نه ده شوې،چې د خبرو اساس او اصلي مسیر وټاکي.
تحلیل کوونکي بیا وايي، طالبان په دې برخه ځکه له احتیاط څخه کار اخلي،چې امریکا تر اوسه د هوکړې بشپړ عمل ته وفاداره نه ښکاري.
د جمهوریت او طالبانو مذاکراتي پلاوي دوحه کې دي او تر منځ یې تماسونه شته دي.
د طالبانو سیاسي دفتر ویاند محمد نعیم وايي: « د اختر له دویمې وروسته هم څو ځلې ناستې شوې دي. خو اعلان شوې نه دي. د مشرانو له تېر ځل ناستې وروسته بیا ناستې نه دي شوي،خو سره په تماس کې یو.»
د سولې مذاکراتي پلاوو په د وحه کې خپل منځي تماسونه ساتلي،خو تر اوسه یې د خبرو پرمیز بحثونه نه دي پيل کړي.
مرکچي ډلو په جلا لېدنو کې بهرنیو ډیپلوماتانو او د ا فغان سولې لپاره د امریکا د بهرنیو چارو وزارت استازو سره هم کتلي دي.