په کابل کې د یو شمېر سیاسي ګوندونو مشران راټول شوي او روانه جګړه یې نیابتي بللې.
دوی وايي، روانې جګړې یوازې نړیوالو او ګاونډیو هېوادونو ته استخباراتي ګټه رسولې.
د بیدارۍ ګوند مشر د بهرنیو ځواکونو له وتو وروسته په هېواد کې جګړه ناروا یاده کړه، او په وینا یې نور د جګړې لپاره هېڅ پلمه نه ده پاتې.
د بېدارۍ ګوند مشر مقصود حسن زاده وايي:« هغه پاکستاني مفتیان چې افغانستان کې یې د جهاد اعلان کړی، پاکستان کې هم د جهاد اعلان کولائ شي او که نه؟ بیا به د دوی واقعي اسلامیت مالوم شي. هغه خلک چې افغانستان ته د جنت کيلي لپاره راځي، غوښتنه مو دا ده، چې نور افغانستان د دوی لپاره جهنم دی او د جنت کيلي پاکستان کې ده.»
یو شمیر نور ګوندونه بیا د اوسنۍ جګړې قربانیان ټول افغان یادوي او د جګړې له ښکېلو خواوو غواړي، چې نور دې په جګړه کې له ولس قرباني نه اخلي.
د عدالت او پراختیا ګوند مشر سید جمال حسیني وايي: « په هېواد کې اوسنۍ جګړه هېڅ ډول شریعي توجیه نه لري. د جګړې له ښکېلو لورو مو غوښتنه دا ده، چې هرڅومره ژر چې کېږي، جګړې ته د پای ټکی کېږي.»
ناسته کې د سولې په اوسني پڅ بهیر هم نیوکې وشوې، چې طالبان او حکومت دې د جګړې پای ته رسولو لپاره مذاکرات ګړندي کړي
دوی د روانې جګړې یواځینۍ حل لاره د سولې مذاکرات بولي او په ټول شموله حکومت جوړولو یې ټینګار وکړ.
