د هلمند یو شمېرپخوانیو چارواکو،قومي مشرانو او په ملي شورا کې د دې ولایت یو شمېر استازي وايي، روان حالت د زغملو وړ نه دی او حکومت باید جدي ورته جدي پاملرنه و کړي.
مشرانو جرګه کې د هلمند استازی هاشم الکوزی وايي:« زما له ولس سره ظلم کېږي، جفا کېږي. د هلمندیانو دښمن زما دښمن هم دی.»
ناسته کې د هلمندیانو پر یووالي هم ټینګار وشو او له حکومته غوښتنه وشوه،چې د دې ولایت لپاره وړ کسان معرفي کړي.
د ولسي جرګې منشي کریم اتل وايي: « حکومت او په حکومت کې یو شمېر لوړپوړي چارواکي دې پایلې ته سره رسېدلي، چې له تاسو سره به مشوره کوي. ټوله درسره مشوره کوي. ښه بېلګه یې د هلمند نوی والي دی. له موږ سره یې د هغه په اړه مشوره کړې او نظر یې اخېستی دی.»
دغه راز په ناسته کې هلمند کې د وروستیو جګړو له امله د بېځایه شویو په وضعیت هم اندېښنه وښودل شوه او غوښتنه دا وه،چې حکومت دې ورسره مرستې وکړي.
په جرګه کي د هلمند استازي وایي،ورځ تربلي د هلمند ولایت حالت په خرابېدو دی او هره ورځ د جګړو له امله لسګونه کسانو ته مرګ ژوبله اوړي او سلګونه نور بیا د جګړو له امله د کورونو پرېښودو ته اړ کېږي.