د کابل- ننګرهار دوېم سړک د جوړېدو چارې چې شااوخوا ۷ کاله وړاندې پېل شوې وې او اټکل دا و،چې په درېیو کالونو کې به جوړېږي،خو د ۷ کالونو په تېرېدو سره دا سړک جوړ شوی نه دی.
اوس اندېښنې دا دي،چې ښايي د اسيا پراختيايي بانک له خوا ورکړل شوي ميليونونه ډالر به بېرته وګرځول شي.
د ټولګټو وزارت وايي، اصلي ستونزه امنيت دی او که په دې برخه کې ولس او سيمه یيزه اداره همکاري ونه کړي د دې پروژې لپاره ځانګړې شوې پېسې به وګرځول شي.
د یاد ولایت ویاند خليل الرحمن اميد وايي: « که چېرې د یادې پروژې د سروې او استملاک چارې بشپړې نه شي، ښايي دغه پیسې له دې پروژې وګرځول شي.
زموږ غوښتنه دا ده، چې په دې برخه کې د سیمې خلک او سیمه ییزه اداره مرسته وکړي.»
سره له دې چې هلته په سړک کار درول شوی،خو د ننګرهار ولايتي اداره د امنيت ډاډ ورکوي او په وينا يې د ياد سړک د سروې چارې روانې دي.
د ننګرهار والي ویاند عطاء الله خوګياڼی وايي: « د سړک سروې چارې روانې دي. د ننګرهار ولایتي اداره او ولسونه په بشپړه توګه د پروژې په تطبیق کې همکاري کوي. »
د ۱۵۰ کيلومتره په اوږدوالي د کابل ـ ننګرهار دوېم سړک د جوړېدو لپاره د اسيا پراختيايي بانک له خوا ۱۱۱ ميليونه ډالر ورکول کېږي،خو د مالوماتو له مخې، د کار د ځنډ له کبله يې ۶ ميليونه ډالر بېرته ګرځول شوي او که کار تمام نه شي وېره ده، ټولې پېسې بېرته وګرځول شي.
