افغانستان پاکستان ته د نړیوال سیسټم پر اساس صادرات پيل کړل.
افغانستان پاکستان ته د ټرانزیټ نړیوال سیستم له مخې د توکو صادرات پیل کړل.
له شاوخوا اوولس کلونو وروسته دا لومړی ځل دی چې افغانستان پاکستان ته د ټرانزیټ نړیوال سیستم له مخې د توکو لیږد رالیږد پیل کړ.
د ټرانسپورټ وزارت وایي، افغانستان او پاکستان دواړه د تير د نړیوال کنوانسیون غړي دي، خو دوی د ناامنیو له امله نه و بریالي شوي چې له پاکستان سره دغه سېستم فعال وساتي.
د دغه سیستم له مخې د افغانستان زرګونه ټنه تازه میوه پاکستان ته ولېږدول شوه.
د دغه سیستم فعالېدل به د دواړو هېوادونو ترمنځ سوداګریزې او ټرانزیټي چارې قانوني کړي.
د تير په نړیوال کنوانسیون کې تر اوسه اته افغان صادروونکي شرکتونه شامل دي او هڅې کېږي چې نور شرکتونه هم پکې راجستر شي.
د تیر ټرانزیټي سېستم په ۱۹۴۹ میلادي کال د ۸ اروپايي هېوادونو ترمنځ د سوداګرۍ او ټرانزیټ د پراختیا په موخه رامنځته، په ۱۹۵۹ میلادي کې پکې د نړۍ ډېری هېوادونه شامل او د یو نړیوال کنوانسیون په توګه وپېژندل شو چې افغانستان په ۱۹۹۵ میلادي کال د تیر یا د ټرانزیټ د نړیوال کنوانسیون غړیتوب ترلاسه کړ.
