ننګرهار کې د یو ه ښوونیز بنسټ په نوښت او د دې ولایت بدني روزنې ریاست په هڅو، د دودیزو لوبو ژوندي ساتلو په موخه د سپورټ او ورزش ځانګړې اوونۍ پیل شوه.
د بدني روزنې او ورزش ریاست مسوولین وايي، د دې ځانګړې اوونۍ د پیل پرمهال به بېلابېلې دودیزې لوبې نندارې ته وړاندې شي او ګټونکو لوبډلو ته به انعامونه هم ورکړل شي، ترڅو د دې لوبو ترسره کولو ته وهڅېږي.
د ننګرهار بدني روزنې رییس عبد السلام وزیر وال وايي: « موږ کوشش کوو چې زموږ دودیزې لوبې له دغو ساحو څخه را ژوندۍ شي. تاسو ګورۍ چې رسۍ کشي، غورسی او نورې دودیزې لوبې شته دي. هدف دا دی چې زموږ دودیزې لوبې بېرته رواج او ژوندۍ شي.»
د سپورټ په دې ځانګړې اوونۍ کې د یو شمیر لوبو ګډونوال لوبغاړي وايي، د دا ډول پروګرامونو ترسره کول د دودیزو لوبو په ژوندي ساتلو کې مهم رول لري او ټینګار کوي چې داسې پروګرامونه دې دوامداره وي او باید ملاتړ یې وشي.
یوتن لوبغاړی وايي: « له حاکم نظام څخه مو غوښتنه دا ده چې د پخوانیو دودیزو لوبو په بېرته را ژوندي کولو کې همکاري وکړي، ترڅو لوبغاړي په ډاډه زړه دا لوبې ترسره کړي.»
یو بل لوبغاړی وايي: « دا ډول پروګرامونه باید لا ډېر شي، ترڅو د دودیزو لوبو پټ استعدادونه را څرګند شي، د خپل ولایت او هېواد استازیتوب وکړي.»
محلي مسوولی بیا وايي، په دې بریالي شوي چې د غرختنې او غورسي لوبې په شمول د یو شمېر لوبو ځانګړي فډراسیونونه رامنځته کړي او هڅه یې داده چې ټولې هغه لوبې بېرته راژوندۍ کړي چې پخوا په کلیوالي سیمو کې ترسره کیدې او اوس د ورکېدو له خطر سره مخ دي.
د ننګرهار بدني روزنې رییس عبد السلام وزیر وال په دې اړه وايي: « زموږ په کلیوالي سیمو کې غرختل، غورسی، توپ ډنډه، رسۍ کشول او نورې لوبې شته چې د ځینو لپاره یې فډراسیونونه جوړ شوي او د نورو لپاره کمیسیون ټاکل شوی، ترڅو دا لوبې را ژوندۍ کړي.»
دودیزې لوبې د ځوانانو په سالمه بوختیا، ټولنیز یووالي او فزیکي پیاوړتیا کې مهم رول لري او نه یوازې د ورزش د ودې لامل ګرځي بلکې د سیمو ترمنځ د همغږۍ، تجربو شریکولو او دغه راز په دې برخه کې د نویو استعدادونو پېژندنې زمینه برابروي.
