د ډيورنډ فرضي کرښې دواړو غاړو ته مېشت لسګونه افغانان، د سپینې ماڼۍ مخې ته راټول شوي وو تر څو پر افغان خاوره او عامو افغانانو د پاکستان پوځي رژيم د بریدونو د دوام په غبرګون کې لاریون وکړي.
لاریون کوونکي ترهګرۍ پاللو له امله د پاکستان پوځي رژيم ته د ترهګريز جوړښت خطاب کوي او وايي، چې په روژه کې يې عام افغانان په نښه او شهيدان کړي دي.
دوی وايي، پر افغانستان د پاکستان پوځي رژيم بریدونه د ټولو نړیوالو قوانینو خلاف دي او نړیواله ټولنه او متحده ایالات باید د پاکستان پوځ د دغه ډول کړنو مخنیوی وکړي، چې له مخې یې د عامو افغانانو وژل معمول ګرځولي.
یو تن لاریون کوونکی وایي: «موږ دلته د دې لپاره راټول شوي یو، چې پر عامو او بېګناه افغانانو د پاکستان د استبدادي او ظالم رژیم د یوې میاشتې بمبارۍ وغندو. دوی په دې بمباریو کې ښځې او ماشومان په نښه کوي. موږ د سپینې ماڼۍ مخې ته راغلي یو ترڅو د دوی دا ظلم او جبر وغندو. موږ له نړیوالې ټولنې او د امریکا له حکومت غواړو، چې د پاکستان د دې کړنو مخنیوی وکړي او اجازه ورنهکړي، چې پاکستاني رژیم نیمه شپه او په خوب ویده افغان مېرمنې او ماشومان بمبار کړي.»
د لاریون یوه ښځینه ګډونواله وایي: «زموږ د راټولېدو موخه د پاکستان پوځي رژیم له لوري پر عامو افغانانو، ښځو او ماشومانو د بمبار غندل دي. هغوی د ترهګرو په نوم پر بېګناه ماشومان او ښځې په نښه کوي. غواړو نړۍ ته وښیو، چې ترهګري او تمویل یې له پاکستان او د دغه هېواد د پوځ مشرانو له خوا کېږي او باید نړیوال بنسټونه او سازمانونه پاکستان پوځي رژیم له خپلو دغه کړنو منع کړي.»
د جرمني په هامبورګ ښار کې هم پر افغانستان د پاکستان پوځي رژیم د بریدونو په غبرګون کې افغانانو لاریون کړی.
دوی پر افغانستان د پاکستان بریدونه غندي او د افغان ځواکونو په ملاتړ شعارونه ورکوي. همدا راز لاریونوال له نړیوالې ټولنې غواړي، چې پر افغانستان د پاکستان يرغل پر وړاندې جدي اقدامات وکړي.
یو تن لاریون کوونکی وایي: «یو ځل بیا پر نړیواله ټولنه، بشر نړیوالو حقونو سازمان او نورو ادارو غږ کوو، چې ژر تر ژره پر پاکستان فشار راوړي؛ تر څو د افغانستان په خاوره او خلکو بمبارۍ او د الوتکو بریدونه ودروي.»
شنونکي بیا وايي، چې د پاکستان تېري پر وړاندې په هېواد کې دننه او بهر د افغانانو یووالی او پر وړاندې یې د ټولو واحد دریځ د دې ښکارندويي کوي، چې د افغانانو لپاره د خپل هېواد عزت او خپلواکي له هر څه مهمه ده او په دغه برخه کې ټول یو موټی دي او هیڅ قدرت یې نه شي بېلولی.
د سیاسي چارو شنونکی، نجیب الله جامع په دې اړه وایي: «د پاکستان د تېري او برید پر وړاندې په هېواد کې دننه او بهر د افغانانو متحد او واحد دریځ او له خپلي دفاعي ځواکونو ملاتړ د دې ښکارندویي کوي، چې موږ ته د خپل هېواد عزت او خپلواکي له هر څه مهمه ده او هیڅ قدرت مو نه شي بېلولی.»
باور دا دی، چې افغانان د خپلو هېواد او هېوادوالو پر وړاندې جنایتونه نشي زغملی او په هر ځای کې چې وي، د جنایتونو او ظلمونو پر وړاندې به راپورته کېږي.
یو شمېر شنونکي وايي، افغانان د بهرنیو تیریو پر وړاندې تل سره یو دي او په داسې شرایطو کې بیا خپل داخلي واړه اختلافات تر شا پرېږدي او د هېواد خپلواکي او د یرغل پر وړاندې درېدل ورته لومړیتوب لري.
د سیاسي چارو شنونکی، توریالی ځاځی وایي: «افغانان چې په هر ځای کې وي؛ خو په افغانستان کې د تېرې نیمې پېړۍ جنایتونو او د هغوی د عاملانو پر وړاندې خپل مخالفت پټ نهساتي او د لاریونونو او غندنو له لارې به غږ اوچتوي.»
د سیاسي چارو بل شنونکی، ادریس محمدي ځاځی بیا وایي: «په کور دننه او بهر د پاکستان پوځي رژیم پر وړاندې د افغان ملي او دفاعي ځواکونو ملاتړ دا وښوده، چې هر کله د وطن او ملي اررښتونو مسله شي؛ نو افغانان بیا په هر حالت او هر ځای کې سره یو موټی کېږي او د دښمن پر وړاندې په یو صف کې درېږي. دا هغه څه دي، چې افغانانو کلونه کلونه ثابت کړي.»
د جرمني په هامبورګ کې پر افغانستان د پاکستان پوځي رژیم تېري پر ضد لاریون ته راوتلي افغانان وايي، چې خپل لاریونونه به د اروپا نورو ښارونو ته هم وغځوي او تر هغې به دوام ورکړي، چې نړۍ د پاکستان پر وړاندې عملي او علني اقدام نه وي کړی.
