د پاکستان لومړي وزیر شهباز شریف د افغانستان په تړاو خپلو تازه څرګندونو کې له کابل سره د ښو او سولهییزو اړیکو په درلودو ټینګار کړی، خو له اسلامي امارت یې غوښتي چې د پاکستان ضد وسلهوالو ډلو پر وړاندې جدي اقدام وکړي.
د پاکستان لومړی وزیر ویلي: « له افغانستان سره نږدې او سولهییزې اړیکې غواړو، خو طالبان دې د افغانستان په خاوره کې د پاکستان ضد وسلهوالو پر وړاندې جدي اقدام وکړي.»
اسلامي امارت بیا د پاکستان لومړي وزیر دې څرګندونو په غبرګون کې ویلي، چا ته اجازه نه ورکوي چې د افغانستان خاوره د پاکستان او یا هم بل هېواد پر ضد وکاروي.
وياند يې زياتوي، افغانان هېڅکله هم د پاکستان په داخلي چارو کې مداخله نه غواړي، خو پاکستان باید د افغانستان ملامتولو په ځای په کور دننه خپل امنیت ټینګ کړي.
د اسلامي امارت ویاند ذبیح الله مجاهد وايي: « د افغانستان اسلامي امارت دریځ دا دی چې د پاکستان په ګډون خپله خاوره د هېچا پر وړاندې کارېدو ته نه پرېږدي او پاکستان باید په دې اړه تشویش ونه کړي؛ ځکه چې افغانان هېڅکله د دې کار اجازه نه ورکوي. کومې ستونزې چې دوی یې حس کوي یا یې لري، اسلامي امارت د هغو په حل کې هم هڅه کړې. دوی باید د خپل هېواد امنیت په کور دننه ټینګ کړي او پر افغانانو تور پورې نه کړي. افغانستان د پاکستان په چارو کې مداخله نه کوي او نه دغه کار د ځان په ګټه بولي.»
په ورته حال کې د پاکستان جمعيت علماي اسلام ګوند مشر مولانا فضلالرحمن هم تازه د افغانستان پر وړاندې د پاکستان له پالیسیو او دریځونو پرده پورته کړې.
هغه ویلي، پاکستان تل د افغانستان پر وړاندې د مداخلې کولو تګلاره او سټراټیژي غوره کړې چې په خبره يې، اوس دا ډېپلوماسي او تګلاره ناکامه شوې.
نوموړي زیاته کړې، د اسلاماباد همدې دریځ له امله د دواړو هېوادونو ترمنځ بې باوري زیاته شوې او وضیعت یې لا پسې پېچلی کړی. فصلالرحمن د کابل او اسلاماباد ترمنځ د ستونزو حل لپاره د جدي ډېپلوماټیکو هلو ځلو اړتیا مطرح کړې.
د پاکستان جمعيت علمای اسلام ګوند مشر ویلي: « پاکستان د افغانستان پر وړاندې تل لاس وهونکې تګلاره خپله کړې چې اوس یې دا ډېپلوماسي او تګلاره ناکامه شوې او له امله یې د دواړو هېوادونو ترمنځ بې باوري زیاته شوې. پاکستان باید د افغانستان پر وړاندې د زور کارولو په ځای د ډېپلوماسۍ له لارې ستونزه حل کړي.»
مولانا فضل الرحمان د کومې وسلهوالې ډلې د نوم له اخستو پرته پر پاکستان نیوکه کړې چې د غلطو سیاستونو له امله يې اوس هغه ډلې هم د پاکستان پرضد فعالیتونه کوي چې یو وخت پر اسلام اباد پورې تړلې وې.
شنونکي بیا وايي، پاکستان له تېرو څو لسیزو راهیسې د افغانستان پر وړاندې شوم او ناوړه سیاست او تګلاره غوره کړې چې له امله یې اوس خپله ستونزو کې راګیر دی.
دوي زياتوي، په کار ده چې پاکستان د افغانستان پر وړاندې خپلو دریځونو او پالیسیو کې ژور بدلون راولي او دا کولی شي چې د کابل او اسلاماباد ترمنځ ستونزو په حل کې اغېزناک تمام شي.
د سیاسي چارو شنونکی شهزاده مسعود وايي: « تر هغو چې پاکستان په خپله پالیسۍ کې اساسي بدلون را نه ولي، ستونزې نه هوارېږي. په تېرو څلورو لسیزو کې د دوی پالیسي نه د پاکستان په ګټه وه نه یې د ګاونډیانو. افغانان له ټولو ګاونډیانو سره متمدنه اړیکه غواړي او هیله لري چې پاکستان هم ورته لاره خپله کړي.»
له هغې وروسته چې پاکستان او خيبرپښتونخوا کې بریدونه او ناامنۍ زیاتې شوې، پاکستان یو ځل بیا پر افغانستان تور پورې کوي چې هلته د روانو ناامنیو ریښې په افغانستان کې دي.
هغه څه چې اسلامي امارت تل رد کړې او بې بنسټه ادعاوې یې بللې دي.
