<h2>د زندانونو چارو د سمون اداره وايي، چې د کابل په ښځینه زندان کې یی ښځو ته د نورو اسانتیاو ترڅنګ د زده کړو ځانګړي پروګرامونه، مسلکي کورسونه او د نورو مهارتونو د زده کړې امکانات برابر کړي دي.</h2> <h2>د کابل په ښځینه زندان کې د هغو کوچنیو ماشومانو لپاره، چې له خپلو میندو سره یو ځای دلته شپې ورځې سبا کوي؛ د ښې روزنې لپاره یو وړکتون هم جوړ شوی دی.</h2> <h2>د زندانونو چارو د سمون ادارې عمومي رییس، محمد یوسف مستري وایي: «په ښځینه زندان کې له یو شمېر ښځو سره د هغوی داسې کوچني ماشومان اوسېږي، چې په یوازې ځان د ژوند کولو امکانات نهلري. د دې لپاره چې دغه ډول ماشومان سالمه بوختیا ولري نو د زندان دننه مو ورته د لیک لوست زدهکړو، وړکتون او لوبو هر ډول اسانتیاوې برابرې کړې دي.»</h2> <h2>د زندانونو چارو د سمون ادارې عمومي رییس زیاتوي، په ښځینه زندان کې د بندیانو د اوسېدو خونې او روغتیايي خدماتو تر څنګ د پاک چاپیریال په برخه کې هم ښه پرمختګونه شوي دي.</h2> <h2>د زندانونو چارو د سمون ادارې عمومي رییس وایي: «ماشومانو ته د دغه ډول اسانتیاوو رامنځته کول؛ د هغوی د میندو په روان هم اغېز کوي او کله چې خپل ماشومان خوشحاله ګوري، د زندان شپې ورځ ورباندې اسانه تېرېږي. د ماشومانو روغتیایي وضعیت ته پر وخت او منظمه توجه کېږي. هغوی ته بسکوېټ او د عمر مطابق شیدې او نور غذایي توکي ورکول کېږي.»</h2> <h2>د زندانونو چارو د سمون اداره ډاډ ورکوي، چې د دې ادارې اړوند په ټولو زندانونو کې د اصلاح او روزنې پروګرامونه به لا پراخېږي او د بندیانو لپاره به لا زیاتې اسانتیاوې رامنځته کړي.</h2> <h2>نشر یې کړئ</h2>
