شمشاد ته سرچینو تایید کړې چې د افغانستان، پاکستان او چین لوړ پوړي چارواکي د چارشنبې په ورځ د چین اورومچي ښار کې سره جرګه کېږي.
د بهرنیو چارو وزارت یوې سرچینې شمشاد ته وویل، د همدې لپاره د چهارشنبې په ورځ یو پلاوی چین ته روان شوی دی.
سرچینو شمشاد ته منلې چې په دې پلاوي کې د بهرنیو چارو وزارت په ګډون د بېلابېلو ادارو غړي ګډون لري، خو اسلامي امارت لا تر اوسه د پلاوي د جوړښت او غړیو په اړه په رسمي توګه څه نه دي ویلي.
د حکومتي سرچینې په خبره: « د افغانستان اسلامي امارت په پلاوي کې د بهرنيو چارو وزارت استازي محب الله وثیق او عبدالحی قانت، د کورنیو چارو وزارت استازی عارفالله، د دفاع وزارت استازی روحالله عمر او د استخباراتو لوی ریاست استازی یحیی تکل شامل دي.»
پلاوي ته نږدې سرچینو وايي، دوی یوازې پر امنیتي مسایلو خبرې نه کوي بلکې غواړي له پاکستان سره د کډوالو، اقتصادي اړیکو او سوداګریزې راکړې ورکړې او ټرانزیټ په ګډون پر ټولو مسایلو خبرې وکړي. د دوی په خبره، یوازې امنیتي او د اوربند موضوع د دواړو ترمنځ شته ستونزه نه شي حلولی.
سرچینه دغه راز وايي، له درېیم ګړي چین او له پاکستاني پلاوي سره مخامخ خبرې هم په پلان کې شاملې دي.
پاکستاني خبري رسنیو هم د دې هېواد بهرنيو چارو وزارت د یوه جګپوړي چارواکي له خولې دا کېدونکې ناسته تایید کړې ده.
د پاکستانیو رسنیو په راپورونو کې راغلي: « د پاکستان لومړي وزیر مرستیال او د بهرنیو چارو وزیر اسحاق ډار چې د سې شنبې په ورځ د چین په سفر و، د چین حکومت ترې د دې غونډې غوښتنه کړې ده.»
د چارو څارونکي وایي، پاکستان له هر اړخه هڅه کوي چې نور له افغانستان سره روانې ستونزې او کړکېچونه پای ته ورسوي.
د دوی په اند، پاکستان غواړي د افغانستان په ځای خپل ټول پام پر ایران ورټول کړي.
د نړیوالو چارو شنونکی واحد فقیري وايي: « پاکستان کوشش کوي چې خپله ټوله انرژي د پاکستان مسئلې ته وقف کړي، ځکه هغه ډېره مهمه ده. دوی غواړي د اوس لپاره له افغانستان څخه ځان خلاص کړي؛ ځکه د پاکستان حکومت د دې توان لري چې اوس د خپلو خلکو توجه د ایران خواته واړوي.»
پخوانی ډېپلوماټ عزیز معارج وايي: « چین په سیمه کې یو زبررځواک هېواد دی او له افغانستان او پاکستان سره ښې اړیکې لري. نو له همدې امله ښايي په ټولو مسایلو کې اغېز هم ولري.»
له دې وړاندې هم د افغانستان اسلامي امارت او پاکستان ترمنځ په قطر، سعودي او ترکیه کې ناستې وشوې، خو بې له کومې مشخصې پایلې پای ته ورسېدې او د دواړو لورو ترمنځ کړکېچ دوام وکړ.
په ورته مهال، د چین بهرنیو چارو وزارت هم ویلي چې د پاکستان لومړي وزیر مرستیال او بهرنیو چارو وزیر اسحاق ډار چین ته رسېدلی او له خپل چینايي سیال وانګ يي سره یې بېجینګ کې لیدلي دي.
