ملي امنیت ځواکونو په کندهار کې د داعش ډلې د جلب و جذب مسوول نیولی دی.
کندهار کې د داعش د جلب او جذب عمومي مسوول نيول شوى دى.
د چارواکو په خبره، دغه کس په کنړ کې د داعش د سل کسیزې ډلې مشري لرله او اوس کندهار کې داعش ډلې ته د ځوانانو د جلب او جذب په موخه راغلی و.
چارواکي د هغو شلو وسله والو د نيول کېدو خبر هم ورکوي، چې د ۱۰زره افغانیو په بدل کې یې هدفي وژنې کولې.
دا لومړی ځل دی، چې په کندهار کې داعش ډلې ته د جلب او جذب فعالیتونو خبر ورکول کېږي.
د کندهار چارواکي وايي، د ملي امنیت له لورې د داعش ډلې د جلب او جذب مسوول، چې عبدالسلام نومېږي نيول شوی دی.
د کندهار والي حیات الله حیات وايي، دغه کس په کونړ کې د داعش وسله والو د سل کسیزې ډلې مشر و، چې تازه په کندهار کې د ځوانانو د جلب او جذب لپاره ټاکل شوی و.
چارواکي د هغې شل کسیزې ډلې د نیول کېدو خبر هم ورکوي، چې په کندهار ښار او ولسواليو کې یې په جګړو او چاودنو کې لاس درلود.
د کندهار د ملي امنیت رییس وايي، په یادو نيول شویو کسانو کې یو شمېر داسې کسان هم شته، چې د ۱۰ زره افغانیو په بدل کې به یې هدفي وژنې کولې.
دغه کسان په داسې حال کې نيول کېږي، چې په کندهار ښار کې هدفي وژنې زیاتې شوي دي.
د معلوماتو له مخې په کندهار ښار کې هره ورځ په اوسط ډول یو کس په هدفي برید کې وژل کيږي.
