زلمي خلیلزاد د افغان سولې د نوو هڅو لپاره بیا اوو هېوادونو ته سفر پیل کړ.
د امریکا د بهرنیو چارو وزارت ویلي، خلیلزاد به د افغان حکومت له مشرانو او نورو افغانانو سره د امریکا او طالبانو د مذاکراتو په اړه خبرې وکړي او هغوی به د یوه پراخ مرکچي پلاوي جوړولو ته وهڅوي.
زلمی خلیلزاد به د افغان سولې په تړاو د اپریل تر ۱۰ مې افغانستان، بریتانیا، بلجیم، پاکستان، ازبکستان، اردن او قطر ته لاړشي.
د امریکا د بهرنیو چارو وزارت ویلي، خلیلزاد به کابل کې د افغان حکومت له مشرانو او نورو افغانانو سره د امریکا او طالبانو د مذاکراتو په اړه خبرې وکړي او هغوی به د یوه پراخ مرکچي پلاوي جوړولو ته وهڅوي او له افغان مشرانو سره د طالبانو او امریکايي پلاوي د خبرو د راتلونکي پړاو په اړه سلا مشورې وکړي.
د امریکا بهرنیو چارو وزارت نه دي ویلي چې خلیلزاد به لومړی کوم هیواد ته لاړ او په قطر کې به له طالبانو سره بل پړاو خبرې کله پیلوي.
له دې سره کابل کې د امریکا سفیر جان باس ویلي، طالبان او افغان حکومت به پر هغه مسایلو بحث وکړي چې یوازې افغانان پر هغو موضوعاتو پرېکړه کولی شي.
جان باس ویلي، کله چې د امریکا او طالبانو ترمنځ هوکړه وشي، له هغې وروسته به د طالبانو او افغان حکومت ترمنځ بین الافغاني مذاکرات پیل شي.
کابل کې د امریکا سفیر ویلي، تر هغې به افغانستان یوازې پرې نه ږدي څو سولې ته نه وي رسیدلی.
جان باس ویلي، غواړي له افغانانو سره مرسته وکړي څو راتلونکي کې داسې نظام ولري چې ټول وګړي یې په امن او ثبات کې ژوند وکړي.
