طالبان د پسرلنیو عملیاتو د پیل لپاره د چمتوالي په حال کې دي .
د هوا په ګرمېدو سره یو ځل بیا طالبان د جګړې لپاره په چمتووالي بوخت دي.
طالبان وايي، تر اوسه یې د نوي کال عملیاتو ته نوم نه دی ورکړی او د ثور میاشت کې به یې پیل کړي .
دا چې د طالبانو د عملیاتو پروړاندې ملي دفاع وزارت څه تدابیر لري، وزارت یې په تړاو له څه ویلو ډډه کوي .
خو غوښتنې بیا دا دي چې دواړه لوري دې د سولې خبرو ته انتظار وباسي او له جګړې دې لاس واخلي .
طالب ویاند ذبیح الله مجاهد شمشاد ته وویل چې د ژمي په پایته رسیدو سره به دافغان ځواکونو پروړاندې خپل عملیات پیل کړي .
مجاهد وايي لا یې د نوي کال عملیاتو ته نوم نه دی ورکړی خو دپیل سره سم به یې نوم هم په ډاګه کړي .
طالبان هرکال خپلو عملیاتو ته نومونه ټاکي چې تیرکال یې د الخندق عملیاتو په نوم جګړه پیل کړه او تراوسه دوام لري .
ملي دفاع وزارت هم هرکال د هوا په ګرمیدو سره د طالب وسله والو احتمالي بریدونو د مخنیوي لپاره چمتوالی نیسي خو دا چې سږ کال یې تدابیر څه دي د دغه وزارت ویاند قیس منګل په دې تړاو خبرو کولو ته وخت نه لري .
شنونکي بیا په دې باور دي چې سږکال دطالبانو او امریکا ترمنځ دسولې خبرې په چټکي سره روانې دي او هیله مندي شته چې پایله به ورکړي.
غوښتنه دا ده چې دواړه لوري دې دسولې مذاکراتو ته په تمه شي او جګړې ته د چمتووالي پرځای دې دواړه خواوې دفاعي حالت غوره کړي .
افغان حکومت هم تیر کال د شفق په نوم هوايي او ځمکني عملیات پیل کړي و چې لاهم دوام لري د چارواکو په خبره چې د دغو عملیاتو پایله کې ګڼ شمیر سیمې تصفیه او په سلګونه وسله وال وژل شوي دي .
