د پاکستان پوځ قبایلي مشرانو ته اجازه نه ده ورکړې چې د خواخوږۍ لپاره د پکتیکا برمل ولسوالۍ ته راشي.
د لسګونو قبایلي مشرانو کاروان د شنبې په ورځ د پکتیا برمل ولسوالۍ ته روان شو چې هلته د وروستۍ پېښې د قربانیانو له کورنیو سره خواخوږي وښيي، خو د پاکستان پوځ یې برمل ته د ورتګ مخنیوی وکړ او تر ډیورنډ فرضي کرښې یې پرېښودل.
علي وزیر د ډیورنډ فرضي کرښې په صفري نقطه کې په ډاګه وویل چې دغه کرښه ولسونه نه شي جلا کولای.
قبایلي مشرانو ته چې د فاتحې لپاره تر ډیورنډ فرضي کرښې اجازه ورکړل شوې وه؛ د افغانانو له تود هرکلي سره مخ شول .
د ډیورنډ کرښې په صفري نقطه کې د برمل ولسوالۍ اوسېدونکو د افغانستان د درې رنګه بیرغونو رپولو سره کوزنیو پښتنو ته لونګۍ ور پر سر کړې.
د ښه راغلاست له مراسمو وروسته د پښتون ژغورنې غورځنګ غړي علي وزیر د پاکستان د پوځیانو په حضور کې خبرداری ورکړی چې د کرښې دواړه خواوو ته ولسونه یو وجود دی او څوک یې نه شي جلا کولای.
علي وزیر د پاکستان ریاست ته په اشارې وویل، هغه قانون ورته د منلو نه دی چې پښتانه له خپلو خلکو سره له خواخوږۍ منع کوي.
ډیورنډ کرښه چې له لسګونو کلونو راهېسې یې افغانان سره وېشلي لا تر اوسه د افغان حکومتونو او دواړو خواوو ولسونو له لوري په رسمیت نه ده پېژندل شوې.
