د ملګرو ملتونو بشري مرستو همغږۍ ادارې (اوچا) د تېر په څېر د افغانستان وضعیت د ځمکې پر سر تر ټولو ستر بشري ناورین یاد کړی او له مرسته کوونکو هېوادونو یې غوښتي،چې د دوی ملاتړ دې وکړي.
اوچا ویلي،سربېره پر دې چې د افغانستان ناورین نړۍ کې ساری نه لري،خو روان ۲۰۲۳ کال کې ورسره د ټاکل شویو پیسو له ډلې مو له پنځه سلنې کمې مرستې ترلاسه کړې دي.
اوچا زیاته کړې:«افغانستان کې ۲۸.۳ میلیونه خلک بشري مرستو ته اړتیا لري. د دې خلکو ۲۳ سلنه ښځې، ۵۴ سلنه یې ماشومان او ۸.۳ سلنه یې معیوبین تشکیلوي. ۲۰۲۳ کال کې په پلان کې ده،چې ۲۳.۷ میلیونه خلکو ته مرسته ورسول شي،چې دا چاره به ۴.۶ میلیارده ډالرو ته اړیتا ولري.»
د اوچا د مالوماتو له مخې، مرسته کوونکو هېوادونو ورسره د غوښتل شویو ۴.۶ میلیارده ډالرو له ډلې د روان کال په څلورو میاشتو کې یوازې د ۱۸ میلیونه او ۴۰۰ زره امریکایي ډالرو مرسته کړې ده.
د ملګرو ملتونو یادې ادارې ویلي،افغانستان کې د نورو برخو ترڅنګ د خوړو خوندیتوب او کرنې، د اوبو او حفظ الصحې، روغتیا، تغذیې او زده کړو هغه سکتورونه دي،چې په ترتیب ورته تر ټولو ډېرې پیسې لګیږي.
اوچا روان ۲۰۲۳ کال کې هغه سکتورونه هم په تفصیلي ډول په نښه کړي،چې په کې اړمنو کسانو ته د مرستو رسولو پلان لري.
اوچا زیاته کړې:« ځېنو کلیدي سکتورونو کې اړمنو کسانو ته د مرستو رسولو په موخه د بودیجې ویش.
د خوړو خوندیتوب او کرنې برخه کې څه باندې ۲۱ میلیونه کسانو ته ۲.۶ میلیارده ډالر، روغتیا برخه کې ۷.۶ میلیونه کسانو ته نږدې ۴۵۰ میلیونه ډالر، تغذیې برخه کې ۷.۲ میلیونه کسانو ته څه باندې ۳۸۴ میلیونه ډالر، د زده کړو برخه کې ۸.۷ میلیونه کسانو ته څه باندې ۲۱۵ میلیونه ډالر.»
له یادو سکتورونو سربېره، خوندیتوب، هوايي چلن او همغږي نور هغه سکتورونه دي،چې اوچا یې روان ۲۰۲۳ کال کې د لګښتونو جزئیات خپاره کړي دي.
اوچا ویلي،افغانستان کې اړمنو خلکو ته د مرستو رسولو بهیر کې ورسره ۲۱۸ همکار بنسټونه همکاري کوي.
