د طالبانو ویاند وايي، قطر کې د طالبانو او امریکا ترمنځ د سولې خبرې په تدریجي توګه پر مخ روانې دي.
رسنیو ته په لیږل شوې اعلامیه کې طالب ویاند ذبیح الله مجاهد ویلي، د دوی او امریکا ترمنځ موضوع مهمه او حساسه ده، نو ځکه هر ګام په احتیاط پورته کوي.
مجاهد ویلي، په تیرو ناستو کې د دوی او امریکا ترمنځ له افغانستان د بهرنیو ځواکونو په وتلو او افغان خاوره د چا په ضد نه کارولو هوکړه شوې وه، چې اوس د همدې موضوعاتو په جزیاتو او څرنګوالي خبرې روانې دي.
د مجاهد په خبره، لا تر اوسه د دواړو لوریو ترمنځ پر کومه مسوده او سند توافق ندی راغلی.
مجاهد وایي، له افغانستان د بهرنیو ځواکونو وتلو او افغان خاوره د بل چا په ضد نه کارولو پرته په نورو هېڅ موضوعاتو خبرې نه دي شوي.
له دې سره د طالبانو د مرستیال د ازبکستان بهرنیو چارو وزیر سره ولیدل.
طالبانو په یوې اعلامیې کې ویلي، ملا عبدالغني برادر د ازبکستان بهرنیو چارو وزیر عبدالعزیز کاملوف او د افغانستان لپاره د ازبکستان ځانګړي استازي عصمت الله سره په قطر کې لیدلي دي.
طالبانو په اعلامیه کې ویلي، چې ازبکستان د افغان سولې پروسه کې د هر راز همکاري ډاډ ښودلی او هوډ یې څرګند کړی چې د افغانستان اقتصادي پراختیا کې به مرستې کوي.
ازبکستاني پلاوي طالبانو ته ډاډ ورکړی چې د افغانستان په داخلي چارو کې به لاسوهنه نه کوي.
