د ټاکنو کمیسیون د پاتو ولایتونو د پارلماني ټاکنو وروستۍ پایلې د نوي کمشنرانو تر ګمارنې ځنډولي دي.
ټاکنیزو شکایتونو کمېسیون څلور ورځې وړاندې د درې ولایتونو وروستۍ پایلې ټاکنو کمېسیون ته د اعلان لپاره لیږلي، خو تراوسه نه دي اعلان شوي.
ټاکنو کمېسیون وايي، له کمشنرانو پرته یې د کارونه د درالانشاء په سرپرستۍ کې په نورمال ډول روان دي.
له دې سره ارګ سیاسي احزابو، مدني او په ټاکنو د څار بنسټونو ته اعلان کړی چې د دې اوونۍ تر پایه د کمشنرانو د ټاکنې لپاره کسان معرفي کړي.
د ټاکنو کمیسیون له کمشنرانو پرته د دارالنشا د رئیس په رهبرۍ خپلې ورځنۍ چارې پرمخ وړي.
د ټاکنو کمیسیون ردوي چې ګواکې د کمشنرانو عزل دې پر ورځني کارونو منفي اغیزه کړې وي.
تر اوسه د ټاکنیزو کمیسیونونو ته تازه کمشنران نه دي معرفي شوي، خو د ټاکنو کمیسیون وايي؛ کارونه یې د پلان مطابق پر مخ ځي او راروانو ولسمشریزو ټاکنو ته چمتووالي نیسي.
ټاکنیز کمیسیونونه لا هم د پارلماني ټاکنو د پاتو ولایتونو پایلې نه دي اعلان کړي، ټاکنیزو شکایتونو کمېسیون د ځینو ولایتونو وروستۍ پایلې ورسره شریکې کړي، خو نه دي اعلان شوي.
د ټاکنو کمیسیون وايي؛ د پایلو ورستي پریکړه او اعلان به نوي کمشنران کوي.
ارګ بیا تېره ورځ د حکومت د رسنیو مرکز کې د ثبت شویو سیاسي ګوندونو له استازو سره غونډه کې اعلان کړی چې د دې اوونۍ تر پایه دې د کمشنرانو د ګمارنې لپاره کسان معرفي او اسناد دې جمع کړي.
د ټاکنو کمیسیون په داسې حال کې را روانو ټاکنو ته د چمتوالي خبره کوي چې لا هم بریالي شوی نه دی چې د پارلماني ټاکنو پایلې بشپړې کړي.
