افغانستان کې د ولسمشریزو ټاکنو د مخه د سولې هوکړه ممکنه ده.
د افغان سولې لپاره د امریکا ځانګړی استازی زلمی خلیلزاد ويلي، تمه لري چې د راتلونکو ولسمشریزو ټاکنو د مخه به وکولای شي له طالبانو سره د سولې هوکړې ته ورسېږي.
خلیلزاد ویلي، تر اوسه د خبرو په لومړي پړاوونو کې دی او په وینا یې لا هم ډېر کار ته اړتیا شته.
هغه ټینګار کړی چې طالبان او افغان حکومت باید یو له بل سره کېني او د خپل هېواد راتلونکې په اړه خبرې وکړي.
خلیلزاد ویلي، داسې نښې شته چې ګنې طالبان به له افغان حکومت سره په یوه څو اړخیزه ناسته کې ونډه واخلي.
خو دایې نه دي ویلي، چې کله به دغه څو اړخیزه ناسته ترسره کېږي چې د نورو اړخونو ترڅنګ طالبانو او افغان حکومت هم سره وګوري.
له طالبانو سره د بهرنیو ځواکونو پر وتلو نه، بلکې د امن لپاره خبرې کوو.
زلمي خلیلزاد ویلي، له طالبانو سره خبرې ګټورې دي او په افغانستان کې د تلپاتې امن لپاره پياوړی ګام دی.
خلیلزاد ویلي، له طالبانو سره د سولې په اړه یې پر يو داسې نظام هوکړه کړې چې له مخې به یې د افغانستان خاوره د امریکا او د امریکا د ملګرو هېوادونو په زیان نه کارول کېږي.
ټاکل شوې د طالبانو او خلیلزاد ترمنځ بله ناسته به د روانې عیسوۍ میاشتې پر ٢٥ مه ترسره شي.
