دوی په دې اند دي،چې افغان حکومت باید د سیمې له هېوادونو سره یو لړ تړونونه لاسلیک کړي،چې افغانستان له نیابتي جګړو وژغوري.
د سیاسي چارو شنونکی هاتف مختار وايي:« د افغانستان او اسلامي نظام دښمنان غواړي، چې دغه نظام په نړیواله انزوا کې پاتې شي او په رسمیت ونه پیژندل شي او د افغانستان چین روابطو ته هم صدمه ورسوي.په دې هېله چې اسلامي امارت څومره ژر کولی شي،چې د افغانستان د ملي منافعو په رڼا کې د دې نظام بقا او ساتلو لپاره په سیمه کې داسې امنیتي او استخباراتي توافقاتو ته ورسیږي،چې هم افغانستان وژغوري او هم وکولی شو،چې په افغانستان کې هر ډول نیابتي جګړې ته د پای ټکی کیږدو.»
یو شمېر نور بیا د چین وروستۍ پرېکړه عجولانه او ناسمه بولي او په باور یې د هغو هېوادونو پر ګټه ده، چې غواړي د افغانستان او چین اړیکې خرابې کړي او په افغانستان کې د چین پانګونې مخنیوی وکړي.
د سیاسي چارو شنونکی سید بلال فاطمي وايي:« دا چې چین دا تصمیم نیولی،چې د چین ټول وګړي دې له افغانستانه ووځي او دلته په افغانستان کې ورته خطر دی، زما په نظر دا تصمیم ناسم دی اوعجولانه دی. د چین دا تصمیم د هغو کسانو پلان کامیابول دي،چې د همدې لپاره یې دا اقدام کړی دی. د امریکا پلان همدا دی،چې داعش په افغانستان کې اوسي، ترڅو چین او روسیه له افغانستانه لرې شي او د دوی ترمنځ روابط جوړ نه شي او دوی ونه شي کولی په افغانستان کې پانګونه وکړي.»
له اقتصادي پلوه له افغانستان سره د چین اړیکې مهمې یادیږي .
اقتصاد پوهان وايي،د بېجینګ دغه تصمیم،چې غواړي خپل اتباع له افغانستانه وباسي په افغانستان کې د دغه هېواد پانګونه او د افغان چین سیاسي او اقتصادي اړیکې زیانمنولی شي.
اقتصادي کارپوه نورالله عزیز وايي:« له چین سره د افغانستان اړیکې ډېره پخوانۍ مخینه لري،که هغه د سیاست په برخه کې ده، که د تجارت او یاهم د پانګوونې په برخه کې دي، دا ټول د افغانستان لپاره ډېر مهم او اساسي دي. د چین هېواد پانګونه د معادنو په برخه کې، د زیر بنا په برخه کې دا ډېرې مهمې دي، د چین دا پریکړه به نه یوازې دا چې د افغانستان په داخل کې ددوي پانګوونه متضرره کړي،بلکې د افغانستان او چین ترمنځ پر سیاسي او اقتصادي اړیکو هم اغیز ولري.»
په ورته مهال د افغانستان بهرنیو چارو وزارت د ویاند مرستیا ضیا احمد تکل بیا ټولو بهرنیو ډیپلوماتانو او اتباعو ته ډاډ ورکوي،چې امنیت به یې خوندي وي او هېڅ څوک به ورته زیان ونه شي رسولی.
هغه زیاته کړه:« د افغانستان بهرنیو چارو وزارت په کابل او د افغانستان په ګوټ ګوټ کې هغو بهرنیو اتباعو که هغه ډیپلوماتان دي،که سیاحان دي، هغوی ته ډاډ ورکوي،چې امنیت به یې خوندي وي او هغوی ته به دښمن ضرر نه شي رسولی.»
