د ملي دفاع سرپرست وزیر ملامحمدیعقوب مجاهد پر مشرۍ د اسلامي امارت یو پلاوی له وړمې ورځې راپدېخوا په متحده عرب اماراتو کې له عرب مشرانو او مېشتو افغانانو سره پر خبرو بوخت دی.
د اسلامي امارت له پلاوي سربېره پخوانی ولسمشر حامد کرزی او یو شمېر سیاستوال هم متحده عرب اماراتو ته تللي دي.
که څه هم د سرپرست وزیر دغه سفر د دوه اړخېزه مسایلو پرسر راڅرخي، خو داسې باور کېږي،چې ښايي بین الافغاني خبرې بېرته پیل شي.
د ملي دفاع سرپرست وزیر ملا محمد یعقوب مجاهد هم په یو ډول دې خبرو ته په اشارې سره وویل،چې د اسلامي امارت دروازې د چا پر وړاندې تړلي نه دي او هرڅوک کولی شي، افغانستان ته خدمت وکړي.
مجاهد زیاته کړې:« ټول قومونه د افغانستان خلک دي. د افغانستان وګړي او په افغانستان کې حق لري، هم یې په اقتصاد کې حق لري، باید د خپل توان ونه سپموي او زمینه ورته برابره شي،هم یې په سیاست کې برخه لري او باید برخه ورکړل شي، هم په نظامي برخه کې ونډه لري، باید دې هېواد ته خدمت وکړي او دفاع ترې وکړي. د هېچا پر مخ دروازې نه دې تړل شوي. هر افغان ورور چې غواړي، په یوه برخه کې خدمت وکړي، کولی شي، خدمت وکړي.»
متحده عرب اماراتو ته د اسلامي امارت د پلاوي او پخوانیو سیاستوالو تګ، هېلې پيدا کړي،چې ښايي دا د بین الافغاني مذاکارتو بیا پیل پیلامه وي، په دې مانا چې د افغانستان قضیه سیاسي حل ته اړتیا لري.
د سیاسي چارو یو شمېر کارپوهان وایي، افغانستان باید له سیاسي انزاو بهر شي.
د سیاسي چارو کارپوه بلال فاطمي وايي:« یعقوب چې دوبۍ ته ځي، دا مهمه ده. هلته چې له مشرانو سره ګوري، تاسو ته عربي هېوادونه مالوم دي، چې دا د غربي نړۍ استازي دي او د هغوی له خوا چې کوم پیغامونه وي، په دې سره بحث کېږي، دا د هغوی ځواب ورکوي، پر دې اساس کېدی شي ښې اړیکې او نوې لارې جوړې شي.»
متحده عرب اماراتو هم افغانستان سره په دوه اړخیره همکاریو تمرکز کړی.
دغه هېواد د افغانستان د مخکيني ولسمشر اشرف غني کوربه هم دی، خو تراوسه څرګنده نه ده چې هغه سره به کوم لوری وویني او که نه.
هغه زیاته کړې:« پر ټولو سرحدونو باندې انشاء الله هېڅوک نه شي کولی، چې یو متر د افغانستان خاورې ته را داخل شي او یاهم د افغانستان خاورې ته په بد نظر وګوري. د سر پر بیه ولاړ یو. که پر چا ښه لګي یا هم بده، د خپل هېواد حریم به ساتو او په هر قیمت به یې ساتو.»
انګېرنې دادي،چې اسلامي امارت په قطر کې د بین الافغاني خبرو په تړاو له امریکایانو سره په کرښه خبرې کړي دي. داسې هم ویل کېږي،چې پخوانی ولسمشرحامدکرزی به له متحده عرب اماراتو وروسته المان ته ولاړشي او هلته به له مېشتو سیاستوالو سره وګوري او ټاکل شوې ده، قطر د بین الافغاني خبرو د بیا پیل لپاره کوربتوب وکړي.
