Skip to content
د پکتیا ولایت ډنډ پټان ولسوالۍ په ځاځي اباد کلي کې د معرفې په نوم یوې ۱۳ کلنې نجلۍ په یوه کرایي کور کې ۱۳۰ نجونو ته د زده کړو زمینه برابره کړې.
معرفه دلته له دوو کلونو راهیسې له معاش پرته نجونو ته د قرانکریم د تدریس ترڅنګ لیک او لوست ور زده کوي.
معرفه زیاتوي:« دوه کاله کېږي، چې دا مدرسه مو خلاصه کړې. زه خلکو ته درسونه ور زده کوم. شااوخوا ۱۳۰ زده کوونکې لرم. دې زده کوونکو کې ځینې د جګړو له امله را بې ځایه شوي دي. »
معرفه له ۵۰ نجونو د میاشتې سل کلدارې اخلي او د دغو خونو پنځه زره کرایه پرې پرېکوي.
دغه راز معرفه د خپلو زده کوونکو لپاره د سرپناه او درسي موادو غوښتنه کوي.
هغې زیاته کړه:« موږ ته دا کور یو چا موقتي راکړی دی، زه د مدرسې زده کوونکو ته ودانۍ نه لرم. د مدرسې زده کوونکې کتابونو او نورو وسایلو ته اړتیا لري.»
اخوا د دغه ټوولګي زده کوونکې د سرپناه او درسي موادو تر څنګ د خپلې ښوونکې لپاره معاش غواړي.
له یوه کال ډېره موده کیږي،چې په هېواد کې له شپږ ټولګي پورته ښوونځي د نجونو پر مخ تړل شوي او د دا ډول ټولګیو جوړونکي له دې کبله هم د ستاینې وړ بلل کیږي،چې د نجونو د زده کړو بهیر یې روان ساتلی دی.
