هغه زیاته کړې:« په افغانستان کې د واک د انتقال بحران لا نه دی حل شوی او اوس هم په افغانستان کې امنیتي ننګونې موجودې دي.»
اسلامي امارت ته په دې ناسته کې له دې امله د ګډون اجازه ور نه کړل شوه،چې روسیه وایي، د ټولګډونه حکومت په جوړېدو کې پاتې راغلي دي.
د بهرنیو چارو وزارت د مسکو له ناستې وړاندې ویلي وو،چې د دوی له حضور پرته دا د مسکو فارمټ ناسته نیمګړې او بې پایلې ده. خو د افغانستان لپاره د پاکستان استازي صادق خان بیا باور ښوولی دی،چې د افغانستان له سرپرست حکومت سره دوامداره ښکیلتیا اړینه ده.
صادق خان زیاتوي:« نړیواله ټولنه باید له افغان چارواکو سره د لومړیتوبونو په درجه بندۍ کې همکاري وکړي، په ځانګړې توګه په هغه ځای کې چې سرپرست حکومت د عمل کولو ژمنتیا ښودلې ده.»
د سیاسي چارو کارپوه شیر حسن حسن وايي:« د مسکو فارمټ ناسته له ګټې خالي نه ده،ځکه په دې کې د سیمې ډېری هېوادونه شامل دي، امریکا له دغه فارمټه وتلې او پر ځای د منځنۍ اسیا هېوادونه، تاجکستان، ازبکستان، ترکمنستان، قرغزستان او قزاقستان ور شامل شوي دي، ایران او هند هم ورشامل شوي دي. پاکستان یې پخوا غړی وه.»
روسیې د مسکو په نوي فارمټ کې امریکا بهر کړې او افغان حکومت یې ورته نه ده بللی.
د تحلیل کوونکو په باور د سیمې هېوادونه د افغانستان په مسله کې د حل لپاره کومه مشخصه ستراتیژي نه لري او تر ډېره همدا هېوادونه خپله په کورنیو ستونزو کې ښکیل دي.
