Skip to content
د سیاسي چارو یو شمېر کارپوهان په دې باور دي،لکه څنګه چې افغانستان اړتیا لري،چې له نړۍ سره رسمي اړیکې ولري همداسې نړۍ هم اړتیا لري،چې له افغانستان سره تعامل غوره کړي.
دوی وايي،د افغانستان جغرافیايي موقیعت ته په کتو نړۍ اړه ده،چې بالاخره د افغانستان له دولت سره د تفاهم او تعامل لاره غوره کړي.
دغه راز دوی وايي، افغانستان د نړۍ برخه ده او نړیوال تعامل د سیمې، نړۍ او افغانستان پر ګټه دی.
د سیاسي چارو کارپوه هاتف مختار وايي:« که د افغانستان هایدرو پلوتیک، ژي پلوتیک او ژي اکانومیک جغرافیې ته وګورو، نړۍ هم دې ته اړتیا لري،چې له افغانستان سره د تفاهم او انعطاف لار غوره کړي، د تعامل لاره نړۍ ته اړتیا ده، هماغسې چې موږ د تفاهم لاره غوره ګڼو او داسې نړۍ ته هم ښايي چې له موږ سره د تفاهم لار غوره کړي او افغانستان به د دوی لپاره مفید او اغیزمن تمام شي.»
ځینې نور بیا په دې باور دی،چې د ګاونډ،سیمې او نورې نړۍ هېوادونه د سوداګرۍ ، ترانزیت او سیاسي برخو کې د افغانستان جغرافیې ته اړتیا لري.
دوی وايي، افغانستان له هرلحاظه نړۍ ته مهم دی او نړیوال نه غواړي،چې داهېواد دې دایمي انزوا کې پاتې شي.
د سیاسي چارو شنونکی عزیز معارج وايي:« لکه څنګه چې افغانستان اړتیا لري،چې له نورو هېوادونو سره تعامل وکړي،همداسې د سیمې او ګاونډ هېوادونه هم افغانستان ته په سوداګریزو چارو کې سیاسي او امنیتي چارو کې دوی هم اړتیا لري او له سیمې لرې هېوادونه هم د سیاسي موخو لپاره دغې جغرافیې ته اړتیا لري او نه شي کولی،چې افغانستان په نړۍ کې د انزوا حالت کې پریږدي.»
په ورته وخت کې کابل کې د ملګرو ملتونو سیاسي استازولۍ د افغانانو د بشري او اقتصادي وضعیت د ښه کیدو لپاره یوازینۍ لاره له اسلامي امارت سره د نړۍ تعامل په ګوته کوي.
د افغانانو د بشري او اقتصادي وضعیت د غوره والي لپاره له اسلامي امارت سره له تعامل پرته بله لاره نه شته دی.
له هغې وروسته،چې په افغانستان کې جمهوري نظام رانسکور شو او اسلامي امارت واک ته ورسید،نړۍ له افغانستان سره خپلې هر ډول رسمي اړیکې پرې کړي،خو لاهم ګڼ شمیر هېوادونه او نړیوال سازمانونه په کابل کې سیاسي استازولۍ لري او ډیپلوماتان یې پرکار بوخت دي.
