د سیاسي چارو تحلیل کوونکي وايي،په دغه ناسته کې د سیمې هېوادونه او د افغانستان ګاونډیان به په اوسني حکومت کې د نورو د افغانانو د ونډې غوښتنه وکړي او همداراز له ترهګرۍ سره په مبارزې او نشه یې توکو دقاچاق پرمخنیوي هم خبرې وکړي .
د پوهنتون استاد فیض محمد ځلاند وايي:« په سیمه کې د ایران په څیر باندې،چین خپله مسکو ازبکستان او نور هېوادنه هم له طالبانو غوښتنه کړې،چې دوی دې خپل حکومت کې نور افغانان هم ورشریک کړي او خپل حکومت دې ټولشموله کړي، له سرپرستۍ دې ووځي، د اساسي قانون په رامنځ ته کولو دې خپله تګلاره روښانه کړي،مسکو کې به نه یوازې په دې مسایلو باندې بلکې له سرحدي د تیرېدونکي تروریزم باندې،مخدره توکو قاچاق باندې او افغانستان ته د بشري مرستو په جلبولو به هم بحثونه وشي.»
ځینې نور بیا وايي، د مسکو فارمټ ناستې ګډونکونکي هېوادونه په افغانستان خپلې سیاسي او اقتصادي ګټې لري او د افغان حکومت د استازي په نه حضور کې به د خپلو ګټو له دریځه د افغانستان په تړاو خبرې ولري.
د سیاسي چارو تحلیل کوونکی طارق فرهادي وايي:« زموږ ګاونډي هېوادونه په افغانستان کې خپلې ګټې لري او په داسې مهمو غونډو کې دوی د خپلو ګټو لپاره عمل کوي او د افغانستان غږ به هلته نه وي او ګټې یې مختلفې دي،له اوبو نیولې تر کانونو پورې. دا د حکومت ناراستي ده،چې نه دی توانیدلی چې روابط داسې وساتي،چې داسې ناستو ته بلنه ورکړل شي.»
خو د سیاسي چارو تحلیل کووونکی سرور نیازی بیا په دې اند دی، د مسکو فارمټ ناسته،چې د افغانستان اوسني حکومت استازي نه دي وربلل شوي،یو اړخېزه ناسته ده او دغه ډول ناستې او کنفرانسونه هېڅ ډول پایلې نه لري.
نیازی وايي، د مسکو فارمټ ناسته کې به یوازې هغه هېوادونه،چې له روسیې سره ګډې ګټې لري،د افغانستان په تړاو به خپلې اندیښنې سره شریکې کړي.
هغه زیاته کړه:« افغانستان د روسیې او امریکا په رقابتونوکې راګیر دی او دغه ډول ناستې چې جوړیږي او هغه هم په یو طرفه ډول،چې هلته د افغانستان استازي حضور ونه لري دغه یو اړخېزه ناستې د افغانستان درد نه شي دوا کولی،خو د دې ناستې هدف دادی،چې روسیه او مشترک المنافع هېوادونه هغه اندېښنې چې د افغانستان په تړاو لري،غواړي پر وړاندې یې یو ایتلاف رامنځ ته کړي.»
اسلامي امارت هم دا مني،چې تر اوسه پورې یې د مسکو ناسته کې د ګډون لپاره بلنه نه ده ورکړل شوې، خو له ټولو هغو ناستو او نړیوالو کنفرانسو ملاتړ کوي،چې د افغانستان پر ګټه دي.
