Skip to content
د افغانستان بیارغونې لپاره د امریکا متحده ایالتو ځانګړې پلټونکې ادارې (سیګار) د یونېسف دمالوماتو لهمخې په خپل راپور کې ویلي،چې واک ته د اسلامي امارت له رسیدو وروسته د ښونځیو د تړل کیدو له امله تر اوسه ۳ میلیونه نجونې له زده کړو پاتې دي.
د سيګار راپور یوه برخه:« یونیسف په خپل راپور کې ویلي،چې افغانستان کې درې میلیونه نجونې چې مخکې ښوونځیو ته تللې اوس یې پر مخ ښوونځي تړل شوي. له تېر یوه کال راهیسې چې طالبان پر افغانستان واکمن شوي، زده کړو ته د نجونو حق نقض شوی دی.»
د سیاسي چارو تحلیل کوونکي وايي، زده کړې د ټولو حق دی او اسلامي امارت دې د ولس په وړاندې خپل مسوولیت ادا کړي او نور دې د نجونو پرمخ د ښوونځیو دروازې پرانیزي.
سیاسي فعاله روح ګل افغان وايي:« اسلامي امارت دې خپل مسوولیت په ملي او نړیواله کچه ادا کړي او د ژر تر ژره دې د نجونو پر مخ د ښوونځيو دروازې خلاصې کړي.»
د ښونځيو تړل کیدو پریکړې عام افغانان ناهیلي کړي او پر اسلاميامارت یې د نړیوالو نیوکې او فشارونه زیات کړي دي.
د سیاسي چارو شنونکي وايي، غوښتنه یې دا ده،چې سرپرست حکومت دې د ښوونځيو په اړه پرېکړه وکړي او د ښوونیز بهیر نور ځنډول بدې پایلې لرلی شي او د هېواد سیاسي او اقتصادي ثبات ننګوي.
د سیاسي چارو تحلیل کوونکی طارق فرهادي وايي:« د ښوونځیو بیا پرانېستل د افغانانو لپاره یو حتمي امر دی. بین الافغاني خبرې اترې دو درې کاله وخت نیسي او پایله به یې هم هغه څه نه وي،چې موږ یې تصور لرو. »
مدني فعاله مریم نایبي وايي:« د نجونو ښوونځیو په تړاو د طالبانو پرېکړه د افغانانو په حق کې یوه لویه جفا او خیانت دی او ځوان نسل به د طالبانو دې دورې ته د تورې دورې نوم ورکړي. خلک به طالبان د اوسني کړکېچ چې ورځ تر بلې په زیاتېدو دی مسوول وګڼي.»
اسلامي امارت تر اوسه پورې یاد راپور ته غبرګون نه دی ښودلی،خو تر دې وړاندې مسوولینو په وار وار ډاډ ښودلی دی،چې د نجونو ښوونځيو د بېرته پرانېستلو لپاره یې ګډه کمېټه ټاکلې او هڅه کوي،یو طرزالعمل جوړ او ښوونځي پرانیزي.
د سېګار دغه راپور داسې مهال خپریږي،چې له ۴۰۰ زیاتې ورځې کېږي،چې له شپږم ټولګي پورته د نجونو پرمخ د ښوونځيو دروازې تړل شوي،خو تراوسه يې د خلاصون په اړه اسلامي امارت کوم اقدام نه دی کړی.
