پخواني ولسمشر حامد کرزي او د افغانستان لپاره د امریکا ځانګړي استازي توماس وېسټ د جمعې پر ورځ د « ۱۴۰۱ کال د پر ۶ مه» پر بېلابېلو موضوعاتو ټیلیفوني خبرې کړي دي.
د کرزي له دفتره په خپرې شوې خبرپاڼه کې ویل شوي،چې دواړو خواوو په دې ټلېفوني خبرو کې د افغانستان پر روانو حالاتو،اقتصادي وضعیت او د تل پاتې سولې او ثبات ټېنګښت لپاره د بین الافغاني مذاکرتو پر اړتیا د نظر تبادله کړې.
دغه راز په خبرپاڼه کې ویل شوي،چې دواړو لورو له شپږم ټولګي پورته د نجونو ښوونځیو پر ژر تر ژره پرانېستلو ټېنګار کړی دی.
د خبرپاڼې یوه برخه:« په دغو خبرو کې سربېره پر دې چې د افغانستان پر روانو حالاتو، اقتصادي وضعیت او د تل پاتې سولې او ثبات ټینګښت لپاره د بین الافغاني مذاکراتو پر اړتیا د نظر تبادله وشوه، دواړو لورو د افغانستان د پرمختګ لپاره د نجونو د منځنۍ او لیسو ښوونځیو پر ژر تر ژره پرانېستلو ټینګار وکړ.»
په دې ټیلیفوني خبرو کې توماس وېسټ بیا ویلي،افغانان به په سختو کې یوازې نه پریږدي او له اسلامي امارت یې غوښتي،چې د نړیوالو له خوا د بشري مرستو ویش بهیر کې دې لاسوهنه نه کوي.
وېسټ زیاته کړې:«نړیواله ټولنه به خپل لستوڼې بډ وهې او د افغانستان بشري وضعیت خطرونو راکمولو کې به ونډه واخلي. طالبان باید په دې برخه کې مرسته وکړي، بشري مرستو کې خپله لاسوهنه کمه کړي او په داسې توګه حکومتولي وکړي،چې پانګونه او مسلکي خلک بېرته افغانستان ته وګرځي.»
اخوا د سیاسي چارو یو شمېر شنونکي وایي،له کرزي سره د بین الافغاني خبرو په اړه د امریکایي استازي خبرې بې اغیزې دي او دا خبرې باید د اسلامي امارت له مشرتابه سره وشي.
د سیاسي چارو شنونکی طارق فرهادي وايي:« د توماس وېسټ خبرې هغه ډاکټر ته ورته دي،چې پر خپل لاس لیکل شوې نسخه په خپله نه شي لوستلی. توماس وېسټه! که چېرته دې غوښتل،چې بینالافغاني خبرې وکړې نو دا اړیکه به دې له ملا حسن اخوند سره نیولې وه. کرزی څه په جنجال اخته کوې،هغه خو خپل کور کې دی.»
ځینې نور بیا د کرزي خبرې د ټولشموله حکومت پر جوړښت او د اسلامي امارت مخالفینو سره پر مذاکراتو تعبیروي او وایي،د افغانانو اصلي استازي یوازي طالبان دي.
دوی وایي،تېرې څیرې آزمایل شوي او ناکامې دي او بیا یې صحنې ته راوستل د افغانستان د روانو دردونو نسخه نه ده.
د سیاسي چارو شنونکی هاتف مختار وايي:« هر هغه ډله،چې نظام تخریب کوي، جګړې ته لابي کوي،افغانستان د بحران خوا ته بیايي، هغه خلک او ډلې د افغانستان د ملت استازیتوب نه کوي. د افغانستان ملت استازیتوب همدغه نظام،چې پر افغانستان حاکم دی،د افغانستان ملت استازيتوب کولی شي.»
د ټولشموله حکومت او له افغانانو سره د خبرو وړاندیزونه داسې مهال کیږي،چې اسلامي امارت ورته تر دې دمه شین څراغ نه دی ښودلی او داسې نه ښکاري،چې نږدې راتلونکې کې دې دا کار وکړي.
