Skip to content
په کندهار ولایت کې د دوشنبې پر ورځ د « ۱۴۰۱ کال د وږي پر ۲۸ مه » د سواد زده کړې نړیواله ورځ د یونسکو سازمان له خوا ونماځل شوه.
په دغه ناسته کې د یونسکو سازمان له لوري د سواد زده کړې د یوه کمپاین خبر هم ورکړل شو،چې پر مهال به یې د هېواد د ۲۰ ولایتونو په ۱۰۰ ولسوالیو کې ۲۵ زره لویانو او ځوانانو ته د عمومي او اساسي زده کړو کورسونه جوړ شي.
د یونسکو سازمان د سواد زده کړې امر شمس الله عمري وویل دغه کمپاین به د (سواد د یوه روښانه راتلونکي لپاره) تر عنوان لاندې پیل کړي،چې د سواد زده کړې په برخه کې عامه پوهاوی رامنځته کړي او عام ولس د سواد له ګټو خبر کړي.
عمري وايي، په دې کمپاین کې د سویلي زون د پنځو ولایتونو ۲۸ ولسوالۍ هم شاملې دي او پر مهال به یې ۷۰۰۰ زده کوونکو ته د لیک او لوست د زده کړې زمینه برابره شي.
هغه زیاته کړه:« د هېواد ۲۰ ولایتونو په ۱۰۰ ولسوالیو کې ۲۵ زرو لویانو او ځوانانو ته د عمومي او اساسي سودا زده کړې کورسونه به وړاندې شي. په دې پروګرام کې به د سویلي زون د پنځو ولایتونو کندهار، هلنمد، نیمروز،اروزګان او زابل ۲۸ ولسوالۍ هم تر پوښښ لاندې ونیول شي، په یادو ولسوالیو کې به شااوخوا ۷ زرو زده کوونکو ته د لیک او لوست زده کړه او نږدې ۴۷۰ ښوونکو ته د ۹ میاشتو کار زمینه برابره شي.»
د پوهنې وزارت د سواد زده کړې مشر مولوي محمد ابراهیم عمري بیا وايي، په تیر یوه کال کې یې ۸۵ زره زده کوونکو لپاره په ټول هېواد کې د بېلابېلو دولتي او غیري دولتي پروژو د تطبیق له لارې د لیک او لوست زده کړې خدمتونه برابر کړي او د ۸۲ سواد ښوونځیو له لارې تر ۴ زره ډېرو ځوانانو او له رسمي زدکړو پاتې شویو لویانو لپاره د زده کړې دوامداره فرصتونه برابر شوي.
هغه زیاته کړه:« په تېره یوه کال کې ۸۵ زره ۸۲۴ زده کوونکو لپاره په ټول هېواد کې د بېلابېلو دولتي اوغیر دولتي پروژو د تطبیق له لارې د لیک او لوست زده کړې خدمات برابر شوي دي.»
د غونډې یو شمېر نورو کډونوالو سواد زده کړه مهمه وبلله او غوښتنه يي وکړه،چې د ښارونو پرتله لېرو پرتو سیمو کې خلکو ته د زده کړو زمینه زیاته برابر شي.
د پوهنې وزارت د مالومات پر بنسټ،د هېواد شااوخوا ۶۰ سلنه خلک نالوستي دي،چې د نفوس زیاتېدا، بې وزلي، ناسم دودونه او جګړه هغه ستر لاملونه دي،چې په افغانستان کې یې ګڼ خلک له زده کړو محروم کړي دي.
