خلیلزاد پاکستان ته خپل څلور ورځنی سفر پای ته ورساوه.
خلیلزاد په خپل ټویټر لیکلي، پاکستان کې یې ګټورې لیدنې درلودلې او د سولې خبرې په سم لوري روانې دي.
خلیلزاد ویلي، تمه لري چې د پاکستان روانې هڅې به سولې برخه کې د ګټورو پایلو لامل شي.
تر دې دمخه زلمی خلیلزاد ویلي، افغانستان کې د امریکا وروستۍ موخه سوله ده او جګړه د اړتیا له مخې کوي.
خلیلزاد ویلي چې د افغان سولې په پروسه کې به د افغانانو خپلواکي حاکمیت او د سیمه ییزو ګټو په ګډون قانوني ګټې هم په نظر کې ونیول شي.
خلیلزاد پاکستان ته تیره اونۍ تللی و او څو ورځې هلته پاتې شو چې د پاکستان د لومړي وزیر په ګډون یې له یو شمېر نورو لوړپوړو چارواکو سره ولیدل.
له دې سره پاکستان، په افغانستان کې سوله د سیمې هېوادونو لپاره مهمه ګڼي.
دغه خبره د پاکستان د پوځ مشر قمر جاوید باجوه د امریکا له ستر درستیز جوزف ووټل سره په لیدنه کې کړې.
قمر جاوید باجوه ویلي، د پاکستان اردو به په افغانستان کې د سولې ټینګښت په موخه ټولې هڅې په کار واچوي.
باجوه او ووټل د پاکستان په کراچۍ ښار کې لیدلي او د افغانستان سربېره یې د پاکستان او امریکا ترمنځ پر نظامي اړیکو او سیمه ییز امنیت خبرې کړي دي.
