د امریکا دفاع وزیر: افغانستان کې مو د ترهګرۍ پر وړاندې مبارزه نه ده ختمه شوې 

اسلامي امارت ګومان کاوه،چې د امریکا پر مشرۍ د  ناټو ځواکونو له وتلو وروسته به افغانستان کې ثبات راشي،خو د یوه کال له تېریدو وروسته دغه تحول معکوسه پایله درلوده.

د  اسلامي امارت او امریکا ترمنځ اړیکې کابل کې  القاعدې شبکې مشر ایمن الظواهري د ساتنې او وژنې د ادعاء پرسر یوځل بیا بې باوره شوي دي.

اوس د امریکا دفاع وزیر لویید اسټین د اسلامي امارت له لوري د خپلواکۍ ورځې لومړۍ کلیزې ته په غبرګون کې ویلي، په افغانستان کې یې له ترهګرۍ سره مبارزه نه ده ختمه شوې.

هغه زیاته کړې:« موږ پوهیږو،چې اوس هم زموږ کار پای ته نه دی رسیدلی. موږ باید د ترهګرۍ پر وړاندې پر مبارزه تمرکز وکړو. موږ دا څو اونۍ وړاندې، د القاعده شبکې مشر چې د سپټمبر ۱۱مې نیټې پر مهال د اسامه بن لادن مرستیال وه، پر نښه کړ او همدا راز مو څو میاشتې وړاندې د داعش ډلې د مهمو غړیو پر ضد هم عملیات وکړل.»

خو کارپوهان وایي،د بهرنیو ځواکونو له وتلو وروسته اسلامي امارت خپلو وګړو ته ان د لومړنیو حقونو په ورکړه کې پاتې راغلی دی.

د سیاسي چارو کارپوه امیر ګران وايي:« د نړیوال ایتلاف ځواکونو له وتلو وروسته، افغانستان کې طالبان واکمن شول. طالبانو په دې یوه کال کې هغه کارونه،چې د افغانستان  خلکو ته یې کړی وی،هغه یې تر اوسه پورې متاسفانه نه دي کړي. د هغې جملې ډلې، تر اوسه پورې یې حکومت نه دی جوړ کړی،حکومت دې ته وايي، چې د ولس او هغه څوک چې د حکومت والۍ دعوه کوي، د هغوی په منځ کې یو ټولنیز ټړون رامنځته شي.» 

له دې سره د خلاصون لارې شورا مشر سید اکبر اغا بیا په دې باور دی،چې اسلامي امارت او واشنګټن باید د تفاهم او تعامل پربنسټ خپلې ستونزې حل کړي او د دې لپاره ښه ده،چې خرابې اړیکې له سره ورغول شي.

په ورته وخت کې اکبر اغا وايي، له امریکا یې غوښتنه دا ده،چې کابل کې د د اسلامي امارت حکومت ومني.

د اسلامي امارت رییس الوزرا ملا حسن اخوند هم د خپلواکۍ په تړاو جوړو شویو مراسمو کې وویل، ټولو بهرنیو سره تفاهم او تعامل غواړي او دوی سره دې ستونزې پر همدې بنسټ حل شي.