له انګریزي ښکیلاکه د افغانستان خپلواکۍ د ۱۰۳ مې کلیزې نمانځغونډه کې د اسلامي امارت ملي دفاع پرست وزیر ملا یعقوب مجاهد وویل،ځینې هېوادونه هڅه کوي،چې خپلې غوښتنې او فرمایشونه،چې دافغانستان ملي ګټې یې نه ایجابوي پر افغانانو ومني.
مجاهد ویلي،هغه څه چې د افغانان دعقدې او ملي ګټو خلاف یې، څوک یې پرې نه شي منلی.
هغه زیاته کړې:« بعضي هېوادونه هڅې کوي،چې موږ او تاسو دې ته قانع کړي،چې د دوی هغه غوښتنه،چې زموږ ملي ګټې یې نه ایجابوي،هغه ورسره ومنو. موږ د خپلې عقیدې او د خپلو ملي ګټو خلاف دهېچا اوامر، فرمایشونه او غوښتنې نه شو منلی.»
له تیر یو کال راهیسې د بشري حقونو تامین، د ښځو د کار او زده کړو حق او له نړیوالې ترهګرۍ سره پریکون هغه شرایط دي،چې نړیوالو د افغانستان د نوي حکومت د رسمیت پیژندنې لپاره وړاندې کړي او پر دغه برخه یې ټینګار زیات دی.
د سیاسي چارو یو شمېر شنونکي بیا دغو غوښتنو ته د فرمایش نوم ورکوي او وايي، له تفاهم پرته د هېوادونو هر ډول غوښتنې فرمایش او د افغانستان کورنیو په چارو کې لاسوهنه ده.
د سیاسي چارو شنونکی توریالی همت وايي:« کوم تفاهم او معاهده چې شوې،لکه د دوحې د هغې پر اساس خبرو ته غوښتنې ویلای شو او دا نور ریښتیا هم چې فرمایشات دي او فرمایش دې ته وايي،چې تاسره یې مخکېنی تفاهم نه وي. د دواړو خواوو ترمنځ تفاهم نه وي شوی او ځان ته یوه خبره کوې او فرمایشات او خواهشات هېڅ کله هم نه پوره کیږي.»
خو ځینې نور بیا وايي، هغه څه چې نړۍ یې د افغانستان له اسلامي امارته غواړي،په دوحې هوکړې کې یې منل شوي، افغان لوري ورته ژمنتیا ښودلې او د نړۍ دغه غوښتنې فرمایشونه نه بلکې د افغان ولس غوښتنه او اړتیا ده.
د سیاسي چارو شنونکی اسدالله ندیم وايي:« هغه څه،چې له دوی غوښتل شوي، دوی دې ورته تعهد وښي او د فرمایش مسله له هېڅ لوري نه ده مطرح شوې او څه چې مطرح شوي دي په حقیقت کې د افغانستان د خلکو غوښتنه ده،نه د کوم دبل هېواد غوښتنه او فرمایش. د نجونو ښوونځیو بیا پرانېسته د ښځو حقونه،د رسنیو ازادي د قانون په رڼا کې کار، دا ټول د افغانستان خلکو غوښتنې او ضرورت دی.»
د سیاسي چارو شنونکی طارق فرهادي بیا وايي، هغه څه چې نړیوالو د افغانستان له نوي حکومت غوښتني،د پرمختګ لپاره خپله افغانستان ورته اړتیا لري او د دې لپاره چې کابل یو ځل بیا نړیوال رسمیت پیدا کړي،باید په دغه برخه کې جدي او واضع کار وشي.
هغه زیاتوي:« ځینې شیان چې افغانستان د خپل پرمختګ لپاره ورته اړتیا لري،لکه د نجونو زده کړې او ځینې داسې مسایل هم شته دي،چې اسلامي هېوادونه غواړي،چې افغانستان یې باید ولري،لکه له نړیوالې ترهګرۍ سره د اړیکو پریکون دا هغه مسایل دي، چې حکومت یې باید په کابل کې له پوره وضاحت سره ترمیم کړي،چې افغانستان وپیژندل شي او اقتصادي ستونزې یې حل شي.»
شنونکي له اوسني بشري او اقتصادي ناورینه د وتلو یوازینۍ لار له نړۍ سره د سالمو اړیکو ټینګښت په ګوته کوي او په خبره یې دې موخې ته د رسیدو لپاره باید په ځینو مسایلو کې انعطاف وښودل شي.
