دغه راز حکمتیار وايي، د دوحې تړون د سولې هوکړه نه،بلکې دوکه وه او د امریکا متحده ایالت ورته درناوی نه لري.
هغه زیاته کړې:« د امریکا متحده ایالت لاهم په افغانستان کې حضور لري. فعال نظامي حضور لري او خپله جګړه یې لا پای ته نه ده رسولې. د دوحې تړون هسې یوه دوکه وه،نه په واقعي مانا د سولې تړون. د امریکا متحده ایالت د دوحې تړون ته هېڅ درناوی نه لري.»
د سیاسي چارو یو شمېر تحلیل کوونکي وايي، د ایمن الظواهري وژنې نړیوال حیران کړي او په خبره یې ښايي له افغانستان سره د نړیوالو په اړیکو سیوری وغوړوي،چې دا کار کولای شي د اسلامي امارت د نړیوال مشروعیت پر وړاندې نوي خنډونه رامنځ ته کړي.
دوی وايي، منفي اغیز به یې وي، خو اسلامي امارت باید نړیوال په خپل باور کې واخلي او د هغوی غوښتنې ومني.
د سیاسي چارو شنونکی خلیل احمد نادم وايي:« طالبانو ته په کار ده،چې د ولس او نړیوالې ټولنې غوښتنې ومني. هغه دا چې ښوونځي دې پرانېزي، ښځو ته د کار زمینه برابره کړي، یو ټولشموله حکومت،چې د دوحې تړون پر اساس،چې دوی ژمنه کړې، جوړ کړي،ترڅو نړۍ له افغانستان سره تعامل وکړي او افغانستان له دې ستونزو خلاص شي.»
خو د افغانستان اسلامي امارت او امریکامتحده ایالت اوس یو د بل پر وړاندې تقابل کې دي او نږدې راتلونکې کې د دې اټکل سخت دی،چې وویل شي له اسلاميامارت سره به نړیوال خپلې اړیکې ژر عادي وضیعت ته راوګرځوي.
اسلامي امارت وايي، د برید په تړاو یې څېړنې نه دي وروستۍ شوي او په برید کې له داسې موادواستفاده شوې، چې د پيښې ځای کې د کوم جسد یوه نښه هم نه ده پاتې او نه دوی ته تر اوسه پورې څه په لاس ورغلي دي.
