د افغانستان پخواني ولسمشر حامد کرزي د جرمني له شپيګل ورځپاڼې سره په مرکه کې ویلي،د نجونو ښوونځيو تړلو حکم اسلامي نه دی او په خبره یې دا کار د ګاونډي پاکستان پر لمسون شوی دی.
هغه زیاته کړې:« د نجونو ښوونځیو تړل اسلامي حکم نه دی او دا کار د ګاونډي هېواد، پاکستان پر لمسون شوی دی. پاکستان یو بې وزله،بې دفاع او کمزوری افغانستان غواړي چې هغوی ته هېڅ ډول ستونزه جوړه نه شي کړای. د نجونو له زده کړو پرته افغانستان یو مړ هېواد دی.»
د سیاسي چارو شنونکي بیا وايي، د اسلامي امارت له خوا پر دې موضوع چوپتیا او د کوم چارواکي لخوا یې مسوولیت نه اخېستل د عامو خلکو ترمنځ د حامد کرزي دا ډول څرګندونې یقیني کولی شي.
دوی که څه هم د حامد کرزي خبرې تائیدوي،خو ځکه یې نیمګړې بولې،چې پر وینا یې پخواني ولسمشر افغانستان کې د پاکستان دا ډول فرمایشونه اجرا کوونکي نه دي یاد کړي.
د سیاسي چارو شنونکی طارق فرهادي وايي:« دا چې پاکستان په افغانستان کې د نجونو ښوونځیو پراېنستل نه غواړي،دا د پاکستان ستراتیژیکه ګته ده،تر څو په ملګرو ملتونو کې افغانستان د دولت له حیثیت لاندې راولي. خو دا باید وویل شي،چې د دې امر اجرا کوونکي په افغانستان کې څوک دي؟ »
د سیاسي چارو شنونکی سید احمد بلال فاطمي بیا وايي:«د کرزي خبره سمه ده،چې افغانستان کې د نجونو ښوونځي د پاکستان پر لمسون بند شوي دي. پاکستان او آی.ایس. آی تل د افغانستان په چارو کې لاسوهنه کړې او د افغانستان ټولې ستونزې د پاکستان له امله رامنځته کیږي. افغانان باید سره یو شي او نور په افغانستان کې د دغه هېواد لاسونه لنډ کړي،ترڅو زموږ هېواد پر رسمیت وپیژندل شي.»
حامد کرزي له شپیګل سره په خپله تازه مرکه کې کابل کې له پاتې کېدو پرته پورته کړې او ویلي یې دي،چې له تېر یوه کال راهیسي نظر بند ساتل کیږي.
د سیاسي چارو شنونکي باور لري،چې کرزی په تېر کې هم د طالبانو نسبي خواخوږی و او اړتیا ده،چې اسلامي امارت د هغه په څېر د هېواد له ټولو مشرانو سره انساني چلن وکړي.
د سیاسي چارو شنونکی هاتف مختار وايي:«کرزی یو له هغو کسانو وو،چې له امریکایانو سره یې تړون لاسلیک نه کړ او تېر کال هم له هېواد څخه ونه تښتېد. نو طالبان باید د هغه درناوی وکړي
او د هغه بند ساتل د ټولو انساني اصولو خلاف کار دی. د نجونو ښوونځیو تړل ساتل افغانستان نور هم منزوي کوي.»
د افغانستان اسلامي امارت نه یوازې دا ځل د حامد کرزي خبرو ته غبرګون ښودلی،بلکې په تېر کې یې هم د لویې جرګي او ښځو حجاب په اړه د هغه نظر د بحث وړ نه و یاد کړی.
