په سویل کې د پکتیا ولایت کډوالو او بېرته راستنیدونکو چارو ریاست مشر صابرګل مصلح وایي،په دغه ولایت کې یې له شااوخوا ۳۵۰ سېلاب ځپلو او بې ځایو شویو کورنیو سره نقدي مرسته وکړه.
مصلح وايي، دغه ۳۵۰ کورنۍ د سروې له مخې، پر نښه شوي او هرې کورنۍ ته ۴۲۰ ډالر ورکړل شول.
مصلح زیاتوي:«هغه کسان،چې هغه زیانمن شوي دي، له هغوی سره هم دا مرسته شوې ده.همکارانو مو بېلابېلو ولسوالیو ته ولاړل او مرکز کې مو هم سروې وکړه. هرې کورنۍ ته ۳۵۰ ډالره ورکوو. اوس د ۳۵۰ کورنیو لپاره د دې مرستو وېش روان دی.»
سېلاب ځپلې کورنۍ بیا وایي،هر څه یې اوبو وړي او دغه مرسته ورته بسنه نه کوي او اسلامي امارت او مرستندویه بنسټونه دې ورسره مرسته وکړي.
یو تن سېلاب ځپلی وايي:«دغه مرستې،چې دوی یې له موږ سره کوي،مننه ترې کوو، خو دا مرستې زموږ لپاره بسنه نه کوي، ځکه د کورنیو شمېر ته،چې ګوره، بې کاري زیاته ده،نو پر دې مرستې به د ډېر کم وخت لپاره د خلکو یو څه ګذاره شي.»
د دغو کورنیو له منځه داسې کورنۍ هم شته دي،چې تر ورځو ورځو یې ډوډۍ نه ده لیدلې.
یوه سېلاځپلې مېرمنه وايي:« خپله اوه ماشومان لرم. اته کسان یتیمان راسره دي او یوه هم ګوڼده راسره ده.له تېرې شپې راهېسې موږ څه نه دي خوړلي. شااوخوا پنځه ورځې کېږي،چې ورېخې پخوو. هېڅ هم نه لرو.»
د مالوماتو له مخې، د وروستیو سیلابونو له کبله پکتیا ولایت کې له زرو ډېر کورونه ویجاړ شوي او مرکز ګردیز او ډېری ولسوالیو کې زرګونه جریبه کرنیزې ځمکې او باغونه زیانمن شوي دي.
