بایډن: کابل کې د القاعدې شبکې مشر ایمن الظواهري هوايي برید کې وژل شوی 

د امریکا متحده ایالتو ولسمشر جوبایډن اعلان وکړ،چې امریکايي ځواکونو په کابل کې د یوه هوايي  برید پر مټ د القاعده شبکې رهبر ایمن الظواهري وژلی دی. 

بایډن وايي، دغه هوايي عملیات د ده په لارښوونه ترسره شوي دي،چې د القاعده شبکې رهبر ایمن الظواهري په کې وژل شوی دی او نوموړی هغه څوک،چې د امریکا پر سوداګریزو برجونو د سپټمبر د یولسمې په برید کې یې لاس درلود.

بایډن زیاته کړې:«د شنبې په ورځ زما په لارښوونه، متحده ایالتو په بریالیتوب سره په کابل کې یو هوایي برید وکړ،چې د القاعدې شبکې رهبر ایمن الظواهري په کې ووژل شو. الظواهري له اسامه بن لادن وروسته د القاعدې شبکې مشر و او تل به له اسامه سره یو ځای وه. هغه د سپټمبر میاشتې د ۱۱ نیټې برید کې هم ښکیل وه او د هغو بریدونو مسوول وو،چې د امریکا په خاوره کې یې څه کم درې زره کسان ووژل.» 

د افغانستان اسلامي امارت بیا په دې تړاو په یوه اعلامیه کې د امریکامتحده ایالتو د بې پیلوټه الوتکو برید په کلکه غندلی او دا یې د دوحې له هوکړې ښکاره سرغړونه او د ټولو نړیوالو اصولو خلاف کار بللی دی. 

خبرپاڼه کې ویل شوي،چې د امریکا دغه ډول کړنې د تیرو شلو کلونو ناکمې تجربې دي او تکرار یې د کابل واشنګټن او سیمې د ګټو خلاف عمل دی او رامنځ ته شوي فرصتونه به زیانمن کړي. 

د اسلامي امارت ویاند ذبیح الله مجاهد وايي:« دا برید که په هره پلمه شوی وي،د افغانستان اسلامي امارت یې پر کلکو ټکو غندي او د نړیوالو اصولو او له دوحې تړون یې ښکاره سرغړونه بولي. دا ډول کړنې د تیرو شلو کلونو د ناکامو تجربو تکرار او د امریکامتحده ایالاتو،افغانستان او سیمې د ګټو خلاف عمل دی او  د داسې کړنو تکرار به یې  شته فرصتونو ته زیان واړوي.» 

خو برعکس  د امریکامتحده ایالتو بهرنیو چارو وزیر انټونیوبلېنکن بیا پر اسلامي امارت تور پورې کوي،چې د دوحې تړون یې نقض کړی دی.

بلېنکن وايي،په کابل کې د القاعدې شبکې رهبر ته پناه ورکول د دوحې تړون نقض او له نړیوالو سره  د اسلامي امارت دهغو ژمنو خلاف کار دی،چې د افغانستان له خاورې به نورو هېوادونو ته ګواښ نه پیښيږي.

بلینکن زیاته کړې:«په کابل کې د القاعدې شبکې رهبر ته پناه ورکول د دوحې هوکړې او د اسلامي امارت د هغو مسلسلو ژمنو،چې له نړیوالو سره یې کړې وې،چې د افغانستان خاوره به د ترهګرو ډلو له لوري د نورو هېوادونو پر ضد نه کارول کیږي،ښکاره نقض دی.» 

په ورته مهال د سیاسي چارو شنونکي بیا وايي، دواړه لوري د دوحې تړون ته ژمن نه دي پاتې شوي او د سولې دغه هوکړه له هغې وروسته نقض شوه،چې د وخت حکومت مذاکراتو پرځای وپرځيد.

د تیرې شنبې په ورځ د کابل ښار په شیر پور سیمه کې پر یوه کور راکټي برید وشو،چې په لومړیو کې ددغه برید څرنګوالی څرګند نه شو اوهماغه ورځ کورنیو چارو وزارت اعلان وکړ،چې د شیر پور سیمه کې راکټ لګېدلی دی او چاته یې زیان نه دی اړولی.

پوره یولس کاله وړاندې ورته پیښه په پاکستان کې هم وشوه،چې هماغه مهال د امریکامتحده ایالتو ځانګړو ځواکونو د یولړ استخباراتي عملیاتو په ترڅ کې دالقاعدې شبکې پخوانی رهبر اسامه بن لادن د پاکستان په ایبټ اباد سیمه کې پاکستاني پوځ  مرکز ته څیرمه په یو کور کې وواژوه .