د سوداګرۍ او پانګونې خونه په پام کې لري چې د راتلونکې تلې(میزان) میاشتې په ۱۵ نېټه دکورنیو تولیداتو ستر نړیوال نندارتون جوړ کړي.
دغه نندارتون چې د افغانستان د نړیوال نندارتون مرکز په تالار کې جوړیږي، ۷ ورځې به دوام ولري.
سوداګرۍ او پانګوونې خونه وايي، په دې ستر نړیوال نندارتون کې به نه یوازې د افغاني تولیدات بلکې دګاونډیو او سیمې هېوادونو صنعتي تولیدات هم نندارې ته وړاندې شي.
دوی وايي، خلک باید د کورنیو تولیداتو د ملاتړ په موخه په ټاکلې موده کې دې نندارتون ته راشي او نندارې ته وړاندې شوي توکي به له نږدې وګوري.
د سوداګرۍ او پانګونې خونې د عامل پلاوي سرپرست، زین الله حسني وايي: « د ګاوند او سیمې هېوادونو او حتا اروپايي هېوادونو څخه مو صنعتکاران او تجاران دعوت کړي، ترڅو په نندارتون کې برخه واخلي او خپل تولیدات نندارې ته کېږي.»
چارواکي وايي، د دې نندارتون له ۸۰۰ زیاتو غرفو کې به بېلا بېل کورني او بهرني تولیدات د ۷ ورځو لپاره نندارې ته وړاندې شي او موخه یې هم د کورنیو تولیداتو وده او د هېواد اقتصادي پرمختګ دی.
د نندارتون مسړولان بیا وايي، هڅه کوي چې دا ستر نړیوال نندارتون په ټولو معیارونو برابر دایر کړي او خلک په اسانه توګه ترې لیدنه وکولی شي.
د سوداګرۍ او پانګونې خونې د عامل پلاوي تخنیکي او پالیسۍ برخې مرستیال، احمد شکیل حازم وايي: « د امام ابو حنیفه نندارتون یوازې یوه سکټور ته نه دی ځانګړی شوی بلکې هغه ټول محصولات په کې نندارې ته اېښودل کېږي چې افغانستان یې تولیدوي. په دې نندارتون کې له ۸۰۰ ډېرې غرفې پلورل شوې او داسې حد ته رسېدلي یو چې د نورو غرفو اېښودلو ځای نه شته.»
د افغانستان د نړیوال نندارتون د مرکز رییس، صابر لطیفي وايي: « د افغانستان د نړیوال نندارتون په استازیتوب، هڅه کوو دا نندارتون په اساسي او فوق العاده بڼه جوړ کړو.»
چارواکي دغه راز وايي، له دې نندارتون یې موخه په افغانستان کې د لا زیاتې پانګونې جلب دی، ترڅو وکولی شي په مټ یې افغانستان کې پانګونې لپاره بهرنیانو ته قناعت ورکړي.
د سوداګرۍ او پانګونې خونې د عامل پلاوي سرپرست، زین الله حسني وايي: « موږ هدف دا دی چې د خپل ځورېدلي ملت رسا غږ تر نړۍ و رسوو او ډاډ ورکړو چې افغانستان کې امن دی، دلته هرڅه شته او پراخ منابع لري.»
د اوزبېکستان، ترکمنستان، تاجیکستان، ترکیې، ایران، هند، روسیې، قزاقستان، قرغېزستان ترڅنګ، د سیمې یوشمېر نورو هېوادونو پانګوال او صنعتکاران به د امام ابوحنیفه په دې پنځم ملي او نړیوال نندارتون کې ګډون وکړي او د خپلو هېوادونو بېلابېل تولیدات به په کې نندارې ته وړاندې کړي.
