افغان او د روسیې د داغستان جمهوریت سوداګرو د څه باندې ۱۴ میلیونه امریکايي ډالرو په ارزښت څلور هوکړه لیکونه لاسلیک کړل.
دا هوکړه لیکونه په کابل کې د افغانستان او د روسیې د داغستان جمهوریت د خصوصي سکټورونو ترمنځ د سوداګریزو اړیکو پراختیا په نوم جوړه شوې غونډه کې، د خوراکي او غیرخوراکي توکو په برخو کې لاسلیک شول.
په دې غونډه کې د داغستان جمهوریت سوداګرو د افغانستان او روسیې ترمنځ د اوږدمهاله فرهنګي او ټولنیزو اړیکو په یادولو سره ټینګار کړی چې روسیه لومړنی هېواد و چې اسلامي امارت یې په رسمیت وپېژانده او له کابل سره یې سوداګریزې راکړې ورکړې پیاوړې کړې.
همداراز، په دې غونډه کې دواړو لورو د سوداګریزو او اقتصادي اړیکو پر پراختیا ټینګار کړی او داغستاني سوداګرو په افغانستان کې د پانګونې او د سوداګریزو راکړو ورکړو د زیاتولو لپاره خپله لېوالتیا څرګنده کړې ده.
