برېښنا د ژوند هغه مهمه اړتیا ده چې نه شتوالی یې نه یوازې ورځنی ژوند ټکنی کوي بلکې د صنعت او اقتصاد د پرمختګ بهیر هم له ځنډ او خنډ سره مخ کوي.
دا په داسې حال کې ده چې له تېرې ورځې راهیسې په بلخ، هرات، سمنګان، جوزجان، فاریاب او سرپل ولایتونو کې له ترکمنستان څخه واردېدونکې برېښنا د تخنیکي ستونزې له امله پرې شوې او ورسره زرګونه کورنۍ او صنعتي فعالیتونه له ستونزو سره مخ شوي دي.
د بلخ صنعتکاران وایي، د برېښنا پرې کېدو د دوی د تولید بهیر ټکنی کړی او د کارخونو فعالیتونه یې له خنډ سره مخ کړي.
دوی له مسوولینو غواړي چې د دې ستونزې د لنډمهاله حل ترڅنګ، د برېښنا د دوامدار تأمین لپاره اساسي او دایمي لارې چارې ولټوي.
صنعت کار محمد یوسف شهباز وايي: « حکومت باید د انرژۍ چمتو کولو په تړاو پېش بین اوسي او دغه راز کڅه وکړي چې له وارداتي برېښنا څخه خلک خلاص او بدیل یې پیدا کړي.»
صنعت کار عبدالرشید احمدزی وايي: « باید جدي کار وشي چې د برېښنا له پلوه پرځان بسیا شو او خپله برېښنا ولرو. د برېښنا له پرې کېدو سره بېکاري زیاتېږي، تولید کمېږي او صنعتکارو ته زیان رسيږي.»
دا چې برېښنا د ننني ژوند له بنسټیزو اړتیاوو څخه ګڼل کېږي، خو له تېرې ورځې راهیسې د هېواد په یو شمېر ولایتونو کې د برېښنا پرې کېدو، د خلکو ورځنی ژوند له ګڼو ننګونو سره مخ کړی دی.
مزارشریف ښاریان وایي، له یوې خوا د اوړي سخته ګرمي او له بلې خوا د برېښنا نه شتوالي د دوی ستونزې لا پسې زیاتې کړې دي. دوی له مسوولینو غواړي چې د برېښنا د بېرته نښلولو لپاره ژر تر ژره اقدام وکړي، ترڅو د خلکو ورځنی ژوند بېرته عادي حالت ته را وګرځي.
د مزار شریف ښار اوسېدونکی ابراهیم وايي: « باید د برېښنا ستونزه ژر ترژره حل کړي، خلک ستونزې لري.»
د مزار شریف ښار اوسېدونکی احسان الله وايي: « موږ اوبه نه لرو او له برېښنا پرته اوبه هم نه لرو. حکومت باید ژر تر ژره د برېښنا ستونزه حل کړي.»
په همدې حال د افغانستان برېښنا شرکت مسوولین مني چې له تېرې ورځې راهیسې د هېواد په ځینو ولایتونو کې د ترکمنستان وارداتي برېښنا د هغه هېواد په خاوره کې د تخنیکي ستونزې له امله پرې شوې، خو دوی ډاډ ورکوي چې یاده ستونزه به ژرحل او برېښنا به عادي حالت ته را وګرځي.
د افغانستان برېښنا عمومي شرکت ویاند، قاري محمد صادق حقپرست وايي: « د ترکمنستان وارداتي برېښنا د تخنکي ستونزې له امله پرې شوې او د یو شمېر ولایتونو برېښنا اغېزمنه شوې. د ستونزې د ژر تر ژره حل او ژر نښلولو په موخه له ترکمني چاوراکو سره د همغږۍ هڅې ادامه لري. برېښنا شرکت د اوزبېکستان له چارواکو سره هم د بدیلې برېښنا په توګه خبرې کړې، ترڅو اړوند ولایتونو ته برېښنا ورکړل شي.»
که څه هم د برېښنا پرچاوي او پرې کېدل د هېوادوالو لپاره نوې خبره نه ده، خو کارپوهان ټینګار کوي چې د برېښنا د ستونزې د تلپاتې حل لپاره باید پر وارداتي برېښنا د تکیې پر ځای، په کور دننه د بندونو جوړولو او د برېښنا د تولید ظرفیت لوړولو ته جدي پاملرنه وشي.
د دوی په باور، د هېواد د برېښنايي اړتیاوو پوره کول به نه یوازې افغانستان د ګاونډیو له برېښنايي احتیاجه خلاص کړي بلکې د اقتصادي او صنعتي پرمختګ لپاره به هم پیاوړی بنسټ برابر کړي.
