د کابل ښار نهمې امنیتي حوزې اړوند سیمه کې د بهرنیانو پر یو مېلمستون موټر بم برید شوی دی.
د عامې روغتیا وزارت ویاند وحید الله مایار ویلي چې برید د ګرین ویلیج په نوم د بهرنیانو په یو مېلمستون شوی، چې څلور تنه یې وژلي او ۱۱۳ تنه یې ټپیان کړي دي.
پېښه د دوشنبې ماښام د ماخوستن شاوخوا اوه بجې شوې ده.
د کابل پولیسو د شمشاد خبریال ته ویلي، چې چاودنه د موټر بم برید له کبله وه.
ولسمشر اشرف غني دغه برید غندلی دی.
طالبانو د برید مسوولیت منلی دی.
د ملي امنیت شورا دفتر د کابل د تېرې شپې برید ته په غبرګون کې ویلي، چې د کابل د تېرې شپې برید غچ به اخلي او په اړه به یې دوی غلی پاتې نه شي.
له امنیت شورا په خپره شوې خبرپاڼه کې لیکل شوي، چې حکومت په سیمه ییزه کچه د سولې د بهیر بریالي کېدو په هڅه کې دی، خو د افغانستان د خلکو دښمنان غواړي دغه بهیر په داسې بریدونو سبوتاژ کړي.
خبرپاڼه کې راغلي، چې ددې برید تر شا که هر څوک لاس ولري، دوی به یې پر وړاندې غلي پاتې نه شي.
