د پکتیا مرکز ګردېز اړوند چوڼۍ، عبدالله کلا، فقیرخاک او شېخانو سیمو له ۱۰۰۰ ډېرو کورنیو ته د نهو ټرانسفرمرونو له لارې د شاوخوا ۴۱ میلیونه افغانیو په لګښت د برېښنا رسونې پروژه بشپړه شوه.
چارواکي وایي، دا پروژه شاوخوا ۴ زره کورنیو ته د برېښنا رسولو ظرفیت لري او هڅې روانې دي چې په دې ولایت کې نورو بې برېښنا سیمو ته هم برېښنا ورسول شي.
د پکتیا برېښنا شرکت رییس، محمد انور راشد وايي: « په دې پروژه باندې شاوخوا ۴۱ میلیونه افغانۍ لګښت راغلی چې په نښلول کېدو سره به یې زموږ ۱ زر ۵۰ کورنۍ له برېښنا برخمنې شي.»
د پکتیا مرستیال والي، محمد انور دین پرور وايي: « خلک باید د پروژې اړوند پاتې پیسې ورکړو، ترڅو په دې پیسو نورو خلکو ته هم برېښنا ورسول شي.»
په ورته مهال، د مرکز ګردېز یو شمېر اوسېدونکي د برېښنا رسونې د دې پروژې په بشپړېدو خوښي څرګندوي او زیاتوي چې تر دې وړاندې د برېښنا نه شتوالي له امله ، ورځني ژوند کې له ګڼو ستونزو سره مخ وو. د دوی په خبره، د برېښنا نه شتوالي تر ډېره په زدهکړو او روغتیايي چارو منفي اغېز کړی و.
د ګردېز اوسېدونکی محمد داود میاخېل وايي: « برېښنا د انسان د ژوند لپاره ډېر اهمیت لري او د هېواد په تاریخ کې دا لومړی ځل دی چې موږ له برېښنا برخمن شوو، موږ له دې ډېر خوښ یو.»
د ګردېز اوسېدونکی محمد عظیم شهاب وايي: « موږ له اوبو، تیارې او هرڅه سره په ستونزو کې وو. په تېر نظام کې زموږ ستونزو ته رسېدنه نه کېده.»
سره له دې چې دا مهال د پکتیا زرمت ولسوالۍ ته د برېښنا رسونې پروژې چارې په چټکۍ سره دوام لري.
سیمه ییز مسوولین ډاډ ورکوي چې په نږدې موده کې به د مرکز ګردېز سربېره، یو شمېر نورو لرو پرتو سیمو او ولسوالیو ته هم د ورداتي برېښنا د نښلولو چارې پیل کړي.
