د کابل ښاروالۍ له لوري په تېرو پنځو کلونو کې د سړکونو ، پلونو، څلورلارو او نورو بنسټیزو او پراختیايي پروژو له پلي کېدو سره، د پلازمینې بڼه تر ډېره بدله شوې ده.
کابل ښاریان وايي، د دې ډول پروژو له تطبیق سره نه یوازې ګڼه ګوڼه کمه شوې بلکې ټرافیکي پېښې او ښاري بې نظمي هم ورسره کم شوي دي.
دوی له اسلامی امارت او په ځانګړي ډول له کابل ښاروالۍ غواړي چې د بنسټیزو پروژو پیل کړې پروسه روانه وساتي، ترڅو کابل ښار په ټولو برخو کې د معیاري بنسټونو څښتن شي.
د کابل ښار اوسېدونکی تاج محمد وايي: « موږ وینو چې له تېرو څو کالو راهیسې ډېر کار روان دی، په ځانګړې توګه د سړکونو، لارو او پلونو جوړولو په برخه کې.»
د کابل ښار اوسېدونکی عمران وايي: « دا ډول پروژې د خلکو د سهولت او موټرو د تګ راتګ لپاره ډېرې ښې دي او له امله یې ګڼه ګوڼه کمېږي.»
د کابل ښار یو شمېر نور اوسېدونکي بیا په تېر کې د بنسټیزو پروژو د نه عملي کېدو ستر لاملونه کورنۍ جګړې ، پراخ اداري فساد او په حکومتي سیسټمونو کې د وېشلو واکونو پایلې بولي.
د کابل ښار اوسېدونکی شکور وايي: « موږ د ښاروالۍ له کارونو ډېر خوښ یو او که خدای کول ډېرې اسانتیاوې به راشي.»
د کابل ښار یو بل اوسېدونکی عارف وايي: « دا چې کار نه کېده، علت دا و چې په وطن کې نا امني وه او نا مناسب خلک واکمن وو.»
په ورته مهال، د کابل ښاروالۍ مسوولان وايي، په روان لمریز کال کې ۲۳۳ پراختیايي پروژو ته ۹ میلیارد افغانۍ ځانګړې کړې دي. د مسوولانو په خبره، په دې پروژو کې ۲۰۰ هغه تر اوسه عملي شوې او د پاتې نورو د ډيزان چارې روانې دي.
د کابل ښاروالۍ استازی، نعمت الله بارکزی وايي: « کابل ښاروالۍ د ۱۴۰۵ لمریز کال لپاره ۹.۱ میلیارده افغانۍ پراختیايي بودیجه ځانګړې کړې او په وسیله یې ۲۳۳ پروژې مخکې وړي. دا مهال کابل ښار کې ۲۱۲ پروژې تر کار لاندې دي او پاتې نورې پروژې هم یا د ډیزاین او یاهم د تدارکاتو په پړاو کې دي. په دې پروژو کې ۱۶۶ پروژې د سړک جوړولو دي او ۷ پروژې هم د هوايي پلونو جوړولو دي.»
د یادونې وړه ده چې د کابل ښاروالۍ په تېرو پنځو کلونو کې د نیالګیو کېنولو، کثافاتو راټولولو او هوايي پلونو او پلچکونو د رغونې ترڅنګ، په پلازمېنه کې۸۰۰ کیلومټره نوي سړکونه هم رغولي چې یوازې په تېر کال کې یې۱۰۰ کیلومټره سړک رغولی.
