«حکومت د مطبوعاتو هېنداره کې» هغه پروګرام دی چې له لارې یې د حکومتي ادارو د تېر یوه کال کړنې او لاسته راوړنې له خلکو سره شریکېږي.
د اسلامي امارت ویاند دې پروګرام کې د خبرو پرمهال رسنیو ته ویلي چې د ازموینو ملي ادارې له لارې په تېر یوه کال کې ۵۳ پنځوس د کانکور عمومي ازموینې اخستل شوې دي چې په کې نږدې ۱۹۰ زره کسانو ګډون کړی.
د نوموړي په خبره، د تېر په پرتله د ازموینو بهیر ساده کولو په برخه کې هم ګڼې اسانتیاوې هم رامنځته شوې دي.
د اسلامي امارت ویاند ذبیح الله مجاهد وايي: « په ۱۴۴۷ هـ ق کال کې د ټول هېواد په کچه د کانکور ۵۳ ازموینې ترسره شوې او ۱۸۹ زره ۱۶۹ تنو داوطلبانو په کې ګډون کړی. د ازموینې پروسې د ساده کولو په برخه کې لازمې اسانتیاوې هم رامنځته شوې دي.»
ذبیح الله مجاهد زیاتوي، اوس مهال د ټول هېوادپه کچه په تخنیکي او مسلکي زده کړو مرکزونو کې له ۷۷ زرو زیات کسان په زده کړو بوخت دي چې له ډلې یې څه باندې ۳۱ زره په لېسو او همدا راز ۴۶ زره یې په تخنیکي او مسلکي انسټیټیوټونو کې په زده کړو بوخت دي.
ذبیح الله مجاهد وايي: « په ۱۴۴۷ کال، د تخنیکي او مسلکې زده کړو په مرکزونو کې ټولټال ۷۷ زره ۸۸۵ تنه زده کوونکي زده کړې کوي چې له ډلې یې ۳۱ زره ۷۷۳ تنه په لېسو او ۴۶ زره ۱۱۲ تنه نور د تخنیکي او مسلکي زده کړو په انسټیټیوټونو کې په زده کړو بوخت وو. په همدې کال، ۳ زره ۴۷۰ تنه نابینایان او ناشنوایان(کاڼه او ړانده) هم په ځانګړو ښوونیزو مرکزونو کې په زده کړو بوخت وو. په همدې موده کې، ۱۱ زره ۹۱۰ تنه له تخنیکي او حرفوي زده کړو برخمن شوي.»
په ورته مهال، مجاهد وايي د تېر یوه کال په موده کې څه باندې دوه نیم زره محصلین او زده کوونکي د سرحدونو، قومونو او قبایلو چارو وزارت ښوونیزو مرکزونو ته جذب شوي چې د ټولو زده کوونکو شمېر یې له ۷ نیم زرو اوړي.
د اسلامي امارت ویاند زیاتوي: « د ۱۴۴۷ کال په اوږدو کې د سرحدونو، قومونو او قبایلو چارو وزارت ښوونیزو مرکزونو ته ۲ زره ۵۸۰ تنه نوي محصلین او زده کوونکي جذب شوي چې په دې سره د ټولو زده کوونکو شمېر یې ۷ زره ۶۴۳ تنو ته رسېدلی. همدارنګه ۹۹۴ تنه زده کوونکي د وزارت له تعلیمي مرکزونو څخه فارغ شوي دي.»
مجاهد دغه راز وايي، د علومو اکاډمي بیا په څېړنیزو او علمي برخو کې ۱۰۰ کنفرانسونه او شپږ ځانګړي څېړنیز سیمینارونه دایر کړي او همدا راز، دغې ادارې ۱۰ عملي او څېړنيز اثار له بهرنیو ژبو د هېواد رسمي ژبو ته را ژباړلي دي.
د اسلامي امارت ویاند په دې اړه وايي: « په ۱۴۴۷ کال کې ۱۰۰ تحقیقي، علمي او څېړنیز کنفرانسونه او شپږ سیمینارونه جوړ شوي. په همدې موده کې ۱۰ عنوانه علمي او څېړنیز اثار له بهرنیو ژبو څخه ملي ژبو ته را ژباړل شوي دي. د پښتو ادبي دایرة المعارف لومړی ټوک بشپړ او د بانکونو قضیو ته د رسېدنې طرزالعمل هم تدوین شوی دی.»
د اسلامي امارت د ویاند په خبره، د افغانستان علومو اکاډمي په تېر یوه کال کې د اسلامي، بشري، طبیعي او تخنیکي علومو په برخه کې ۱۴ څېړنیزې پروژې بشپړې کړي او همدا راز ۱۶۴ علمي څېړنیزې مقالې بشپړې او نشر کړې دي.
