د خوست ښار لوېدیځ لوري ته د ازادۍ مېنې ښارګوټي کې د شاوخوا ۱۵ میلیونه افغانیو په لګښت د نږدې ۱۳۰۰ مټره سړک د بیارغونې چارو له پېل سره، د خوست ښاروالۍ مسوولین وايي، د روان کال تر پایه به د ښار په بېلابېلو برخو کې۳۰ نورې پراختیايي پروژې پلې شي او ورسره هم مهاله به د ښاري پراختیا او اسانتیاوو په موخه د اوږدمهاله پلانونو تطبیق ته هم دوام ورکړي.
خوست ښاروال، حافظ عبدالرشید عمري وايي: « زه تمه لرم چې راتلونکي نږدې وخت کې به دا ډول نورې پروژې هم ولرو. خوست ښار کې به سږ کال د سړکونو، پلچکونو او لایټېنګ په برخه کې ډېر پرمختګونه وشي.»
خوست والي، عبدالرحمن حقاني وايي: « موږ اقتصاد ریاست ته لارښوونه کړې چې له دوی سره مجلسونه وکړي، له خپلو لاس کې شته امکاناتو کار واخلي او که چېرې امکانات کم وي، له مشرانو سره خبرې وکړي، ترڅو دې وطن ته خدمت وشي.»
په ورته مهال، د دې ولایت اوسېدونکي وایي، ښاري سیمو کې د خرابو سړکونو له امله لا هم خلک له پراخو ستونزو سره مخ دي. دوی تمه لري چې د نویو پروژو په تطبیق سره به د تګ راتګ برخه کې د ښاریانو چارې اسانه او شته ستونزې را کمې شي.
دوی د خوست ښار د چټکې پراختیا لپاره د دوامداره بنسټیزو پروژو پر تطبیق ټینګار کوي.
د خوست اوسېدونکی، محمد اکبر خان وايي: « اوس زموږ یو شمېر سړکونه خام دي، دوړې کوي او که جوړ شي، ډېر خوند به وکړي.»
د خوست اوسېدونکی، نبي الله وايي: « زموږ سړکونه ډېر خراب شوي او چې کله باران وشي، موټر په کې نه شي تللی. همدارنګه، کله چې ناروغان پيدا شي، بیا نو ستونزه نوره هم لویه شي. موږ له حکومت مننه کوو چې دا سړک یې جوړ کړ.»
د خوست ښاروالۍ مسوولین وايي، د یادې پروژې چارې چې تازه پېل شوې، په راتلونکو څلورو میاشتو کې به بشپړې شي. په دې پروژه کې دواړو غاړو ته د لښتیو اساسي جوړونه هم شامله ده چې له بشپړېدو سره به یې د سیمې د اوسېدونکو د تګ راتګ ستونزې تر ډېره هوارې شي.
