د زابل امنیه قومندانۍ اړوند د نظامي وسايطود ترمیم ورکشاپ ته د دولایت له مرکز او ولسوالیو څخه هره ورځ نظامي وسایط راوړل کېږي.
د زابل امنیه قومندانۍ مسولین وايي، د اسلامي امارت له بیا ځل راتګ وروسته په تېرو پنځو کلونو کې شاوخوا ۳۷۰۰ نظامي وسایط چې د تېرو جګړو او تخنیکي ستونزو له امله له کاره لوېدلي وو، اوس بېرته فعال شوي او د امنیتي ځواکونو په واک کې ورکړل شوي دي.
د زابل امنیه قومندانۍ ویاند قاري ذبیح الله جوهر وايي: « د زابل ولایت امنیه قوماندانۍ اړوند د تأمیناتو معاونیت او لوجسټیک مدیریت په هڅو، د اسلامي امارت له بیا راتګ څخه تر اوسه پورې بېلابېل نظامي وسایط ترمیم شوي. موږ تر اوسه ۳ زره ۷۰۰ عرادې وسایط ترمیم کړي چې په کې رنجر، انټرنېشنل، هاموې او نورو موټر ترمیم شوي دي.»
د مسوولینو په خبره، خراب شوي نظامي وسایط له ترمیم وروسته د امینت د ټینګښت او د پوځي ماموریتونو ترسره کولو لپاره د زابل مرکز او ولسوالیو کې امنیتي ځواکونو ته سپارل کېږي.
د زابل امنیه قومندانۍ ویاند په دې اړه وايي: « د دې وسایطو په ترمیم سره به زموږ د امنیتي شرطې لپاره ډېرې اسانتیاوې رامنځته شي او دوی به وکولی شي خپلو چارو ته په وخت رسیدګي وکړي او څنګ یې د پښو ځای ته ځان ورسوي.»
په دې ترمیم ځای کې لسګونه تخینکي کارکوونکي هم په کار بوخت دي. دلته د نظامي وسایطو د ترمیم ټول پړاوونه ترسره کېږي او تخنیکي کارکوونکي د پرمختلليو وسایلو له لارې د نظامي وسایطو د ترمیم چارې مخته وړي.
د ورکشاپ تخنیکي کارکوونکی حکمت الله وايي: « موږ دلته د هر هغو وسایطو په ترمیم بوخت یو چې دلته په قوماندانۍ کې شته دي. په دې کې رنجر، هاموې، انټرنېشنل، یورس موټر او موټرسایکلان شامل دي. موږ دلته پوره امکانات او تکړه مستریان لرو او اړتیا نه شته چې څوک د ترمیم لپاره بازار ته لاړ شي.»
د ورکشاپ تخنیکي کارکوونکی صدیق الله وايي: « زموږ د ورکشاپ پرسونل اسلامي امارت ته اطمینان ورکوي چې هر ډول وسایط وي، دلته یې پرزې راغلي دي او موږ یې ترمیمولی شو.»
مسوولین دغه راز وایي، د کورنیو چارو وزارت د اړینو پرزو په برابرولو سره د ورکشاپ د اړتیاوو یوه برخه پوره کړې او اوس مهال لسګونه نور نظامي وسایط هم تر ترمیم لاندې دي.
