پخواني امریکایي ډېپلومات او افغانستان کې د امریکا سفیر ویلي، له اسلامي امارت سره د ژورو اختلافاتو سربېره، واشنګټن له کابل سره د تعامل لپاره عملي دلایل لري.
رونالډ نیومن له ۲۰۰۵ نه تر ۲۰۰۷ میلادي کال پورې په کابل کې د امریکا د سفیر په توګه دنده ترسره کړې ده.
نیومن ټینګار کړی چې اسلامي امارت باید په خپلو پالیسیو کې تغییر راولي او په تېره بیا د ښځو پر وړاندې خپلې تګلارې بدلې کړي.
نیومن وړاندې ویلي، که امریکا د ښځو پر وړاندې د اسلامي امارت موجوده تګلاره له پامه وغورځوي او په کابل کې خپل سفارت پرانیزي، نو په امریکا کې دننه به له سختو سیاسي مخالفتونو سره مخ شي.
په کابل کې د امریکا پخواني سفیر زیاته کړې: « اسلامي امارت باید په خپلو پالیسیو کې بدلون راولي او په تېره بیا د ښځو پر وړاندې خپلې تګلارې بدلې کړي. که امریکا د ښځو په اړه د اسلامي امارت اوسني سیاستونه له پامه وغورځوي او په کابل کې سفارت بېرته پرانیزي، په امریکا کې به له پراخ سیاسي مخالفت سره مخ شي.»
امریکا د ۲۰۲۱ کال په اګسټ میاشت کې د خپلو ځواکونو د وتلو او د پخواني جمهوري نظام له سقوط سره هممهاله، په کابل کې خپل سفارت وتاړه او فعالیتونه یې وځنډول.
رونالډ نیومن وایي، اسلامي امارت د دوحې د مذاکراتو پر مهال هم له امریکا سره د سیاسي اړیکو د دوام غوښتنه لرله، خو غوښتل یې چې امریکايي ځواکونه له افغانستان څخه ووځي.
د نوموړي په خبره، امریکا له اسلامي امارت سره لا دمخه په ځینو برخو کې عملي تعامل لري.
هغه وایي، د امریکايي وګړو د خوشي کولو او له ترهګرۍ سره د مبارزې په برخه کې امریکايي چارواکو کابل ته سفرونه او د اسلامي امارت له چارواکو سره یې تماسونه کړي دي.
نیومن دا خبرداری هم ورکړ چې د افغانستان څخه د واشنګټن مخ اړول ممکن خطرناکه و اوسي.
رونالد نیومن په دې ویلي: « د افغانستان په اړه د امریکا بشپړ بېتفاوته پاتې کېدل ښايي واشنګټن ته خطرونه رامنځته کړي. امریکا پخوا هم څو ځله افغانستان ته شا کړې وه، خو وروسته یې د دې پرېکړې پایلې هم لیدلې دي.»
د افغانستان لپاره د امریکا پخواني سفیر دغه راز ویلي، د افغانستان پراخې معدني زېرمې په راتلونکي کې له کابل سره د امریکا د تعامل لپاره یو بل مهم دلیل کېدای شي.
د رونالډ نیومن دا څرګندونې داسې مهال کړې چې روسیې بیا اسلامي امارت په رسمیت پېژندلی او چین او یو شمېر نورو سیمهییزو هېوادونو له کابل سره خپل سیاسي او اقتصادي تعاملات پراخه کړي دي.
