د اسلامي امارت امنیتي ځواکونو د بدخشان په نسي ولسوالۍ کې د جمعه خان فاتح له تسلیمولو وروسته، په دې ولسوالۍ کې د چاڼیزو عملیاتو پر مهال ګڼې سپکې او درنې وسلې نیولې دي.
پر ټولنیزو رسنیو خپرو شویو ویډیو ګانو کې لېدل کېږي چې امنیتي ځواکونو د جمعه خان فاتح له نږدې ملاتړو او ملګرو ګڼې درنې وسلې او ان بې پیلوټه الوتکې نیولې دي.
په دې ولایت کې څو سترې ډېپوګانې هم کشف شوې چې ویل کېږي د جمعه خان له خوا ساتل کېدې.
پر ټولنیزو رسنیو د ډېرو لاس په لاس شویو ویډیوګانو له ډلې، یوه ویډیو دا هم ده چې امنیتي ځواکونو د جمعه خان فاتح د نږدې ملګري ذبیح الله یاسر له کور څخه د ګڼو سپکو او درنو وسلو د نیولو پر مهال ثبت کړې.
په خپرو شویو ویډیوګانې کې ځايي مسوولان خبرداری ورکوي چې هېچا ته به اجازه ور نه کړي چې د هېواد امنیت اخلال کړي او یا د شورش په نوم بې ثباتي رامنځته کړي.
د فرید په نوم یو تن ځايي امنیتي مسوول وايي: « د یاسر پلار ته مو اطمینان ور کړی چې یاسر راولي او موږ ته یې تسلیم کړي. موږ ته یې اطمینان راکړ چې راولي یې. امارت له چا سره مشکل نه لري.»
د چارو شنونکي په بدخشان کې د امنیتي ځواکونو له خوا چاڼیز عملیات مهم بولي او زیاتوي چې اسلامي امارت باید هغه احتمالي ګواښونه له منځه یوسي چې اوسني ټیکاو ته خطر پېښوي.
د سیاسي چارو شنونکی احمدخان اندړ وايي: « ښه خبره دا ده چې کشفي او امنیتي ځواکونو د بدخشان په هغه سیمه کې چې جمعه خان فاتح په کې واک درلود، ډېرې سپکې او درنې وسلې چې په کې ډرون الوتکې هم شته لاسته راوړې دي. له اسلامي امارت څخه زموږ هیله دا ده چې په شکمنو سیمو کې ښه فلټري عملیات وکړي.»
د سیاسي چارو شنونکی ډاکټر معین ګل څمکنی وايي: « دا د دې ښکارندويي کوي چې بدخشان کې په پراخه کچه وسله موجوده او د اسلامي امارت له خوا نیول شوې. زه باور لرم چې د اسلامي امارت ځواکونه به هغه ټولې وسلې کشف او ترلاسه کړي چې هلته د ګډوډیو لپاره ځای پرځای شوې دي.»
څو ورځې وړاندې امنیتي ځواکونو د بدخشان په نسي ولسوالی کې جمعه خان فاتح له یوې لنډ مهالې جګړې وروسته، تسلیمېدو ته اړ کړ. نوموړی دا مهال تر نظارت لاندې دی او دوسیه یې قضايي ادارو ته سپارل شوې ده.
