په کندز کې د سوالګرو شمېر د تېر پرتله ډېر شوی 

په کندز ولایت کې  په دې وروستیو کې د سوالګرو شمېر د تېر پرتله د پام وړ زیات شوی دی او ځايي خلک یې اندېښمن کړي دي.

 کندز ښار کې د  شپږو اولادونو یوه مور،چې  دوه بچیان یې د وینې پر سرطان اخته دي او خاوند یې په کور کې فلج پروت دی وایې،د خوراک او څښاک لپاره هم څه نه لري او ماشومان یې پر داسې ناروغیو اخته دي،چې درملنه یې سخته ده.

هغې زیاته کړه:«کاریګر نه لرم،نو دلته راځم د ورځې دوه، درې یا هم څلور سوه افغانۍګټم. خاوند مې کار نه کوي، یو کال کېږي فلج دی او د څلورو اولادونو نفقه پیدا کوم.»

 اخوا یوه بله سوالګره بیا وایې،د مجبوریت له مخې تر دې لمر ته ناسته ده، ترڅو د خپلو اولادونو لپاره یوه مړۍ ډوډۍ پيدا کړي. 

هغې زیاته کړه:« خدای ته مالومه یم،چې را وزم. اولادونه اوس وخت کې څوک نه ساتي. کور کې نوره یوازې یم،دغه یو زوی مې راسره دی. مېړه مې ورک دی.»

د کندز والي  ملا نثار احمد نصرت بیا وايي، د  سوال ګرو له زیات والي سره سم یې اړوند ریاستونو سره خبرې کړي،د ګڼو یې لاس نیوی کړی او هغوۍ چې حرفوي سوال ګر دي، هغه به راټول او لازمې لارښوونې به ورته وشي. 

نصرت زیاته کړه:« موږ دلته سروې هم کړې ده،په دې کې حرفوي کسان هم شتون لري. دا ټول کسان به مشخص کېږي،چې څوک مستحق وي، د هغوی لپاره مو مناسب ځای ټاکلی دی. د دوی د زده کړو، خوړو او نورو اړتیاوو لپاره مو چمتوالی نیولی دی. انشاء الله دا ستونزه به حل شي.» 

کندز کې که څه هم د بېلابېلو موسسو لخوا پر اړمنو خلکو د مرستو لړۍ په چټکۍ روانه ده،خو دا چې دلته د بې وزلو شمېر زیات دی ندي توانېدلي،ترڅو د خلکو لاس له سوال ګرۍ رالنډ کړي.