پلازمېنه کابل کې د کرنې او مالدارۍ د محصولاتو پنځه ورځنی نړیوال نندارتون، د حکومتي چارواکو په ګډون، د یوې غونډې په ترڅ کې پای ته ورسېده.
د کرنې او مالدارۍ تولیداتو دا نندارتون چې پنځه ورځې یې دوام درلود، د یکشنبې په ورځ پای ته ورسېد. د چارواکو په خبره، نندارتون بریالی و او ګډونوالو یې له ۲۰۰ میلیون زیاتو ډالرو په ارزښت، لسګونه هوکړې لاسلیک کړې دي.
د کرنې او مالدارۍ خونې رییس خان محمد فروتن وايي: « په دې نندارتون کې چې په کې ۱۰۰ څخه ډېرو غرفو او شرکتونو ګډون کړی و، له نېکه مرغه د شرکتونو ترمنځ د همکاریو ۷۴ هوکړه لیکونه لاسلیک شول. د دغو هوکړه لیکونو ارزښت له ۲۰۰ میلیون ډالرو څخه پورته دی. باید ووایم چې دغه هوکړه لیکونه ټول د افغانستان د کرنې او مالدارۍ د ودې لپاره لاسلیک شوي نه د وارداتو لپاره.»
په همدې حال کې د کرنې او مالدارۍ وزارت وايي، هڅه کوي د افغان بزګرانو کرنیزو او مالدارۍ تولیداتو لپاره په کور دننه او بهر بازار موندنه وکړي.
د دې وزارت مسلکي معین وايي، اوس افغانستان د غوښې د تولید په برخه کې د صادراتو تر کچې رسېدلی، خو هڅه کېږي چې د کرنیزو محصولاتو د تولید په برخه کې هم پرځان بسیا شي او دې موخې ته د رسېدو لپاره دکرنې بشپړې مکانیزې ته اړتیا ده.
مولوي صدر اعظم عثماني وايي: « موږ په ځینو محصولاتو کې ځان بسیاینې ته رسېدلي یو. د مثال په توګه، د چرګانو محصولاتو یا هم د څارویو د غوښې په برخه کې دې ځای ته رسېدلي یو چې نورو هېوادونو ته یې صادر کړو. موږ اوزبېکستان او نورو هېوادونو ته د غوښې صادرات پيل کړي دي.»
سوداګرۍ وزارت بیا د دې ډول نندارتونونو جوړول نه یوازې د تولیداتو بازارموندنې لپاره مهم ګڼي بلکې زیاتوي چې کولی شي د کورنیو او بهرنیو سوداګرو او پانګوالو ترمنځ اړیکې پیاوړې او د هېواد په اقتصادي وده کې مهم رول ولوبوي.
د صنعت او سوداګرۍ وزارت د نندارتونونو د تدویر رییس یعقوب جاوید وايي: « دا ډول نندارتونونه نه یوازې د تولیداتو معرفي کولو لپاره مهم دي بلکې د تولیدوونکو، سوداګرو، پانګوالو او مصرفوونکو ترمنځ د اړیکو ټینګولو لپاره هم ارزښت لري.»
د کرنې او مالدارۍ د محصولاتو په دې نړیوال نندارتون کې له افغانستان سربېره د سیمې ګڼ شمېر هېوادونو او سوداګرو هم ګډون درلود چې د خپلو هېوادونو د کرنې او مالدارۍ برخې تولیدات یې نندارې ته وړاندې کړي وو.
د یاد نندارتون هندي او ایراني ګډونوال خوښ دي چې په تېرو پنځو ورځو کې یې له افغاني لوري سره د خپلو تولیداتو په اړه خبرې او هوکړې وکړې.
هندی پانګوال محمد عبدالله وايي: « هرڅه ښه وو، دلته خلک کار کول غواړي، خو دوی یو پلټفارم ته اړتیا لري چې موږ یې ورته له هند برابروو. افغانان موږ سره له وړاندې کار کوي، موږ د کرنې په برخه کې بېلا بېل سبزیجات لرو چې ټول به ورته برابر کړو. پر موږ زیات رش دی خو موږ ترې راضي یو.»
افغان پانګوال بشیر احمد شهزاده وايي: « په دې ډول نندارتونو کې ګډون د شرکتونو او پانګوالو لپاره د پېرودونکو او بازار موندلو په تړاو ډېر ښه پرېوځي. موږ وکولی شول د دې نندارتونو له لارې د تاجیکستان هېواد له استازي سره تفاهم نامه لاسلیک کړو.»
ایرانۍ پانګواله بازګیر وايي: « موږ د افغانستان د کرنې او مالدارۍ په دې پنځه ورځني نندارتون کې ډېر مثبت فیډبک درلود. موږ وکولی شول د افغانستان له سوداګرو، کروندګرو او مالدارو سره ښې اړیکې جوړې کړو، لومړنۍ خبرې وکړو او ټاکل شوې موږ په ایران کې د دوی کوربه توب وکړو او غوره پایلې ترلاسه کړو.»
ایرانی پانګوال سید محمد ضیایي وايي: « په دې نندارتون کې ونډه اخستلو موږ ته ډېره ګټه وکړه او ګڼو لیدونکو زموږ له غرفې لیدنه وکړه او تمه لرو چې راتلونکي کې نورې همکارۍ هم ولرو.»
د کرنېزو او مالدارۍ تولیداتو په دې پنځه ورځني نړیوال نندارتون کې ۱۰۰ کورنیو او بهرنیو شرکتونو په ۵۰۰ غرفو کې د کرنې او مالدارۍ برخې تولیدات نندارې ته وړاندې کړي وو چې زرګونه خلک د دوی د تولیداتو نندارې ته ورغلي وو او د بازار موندنې لپاره ښه فرصت برابر شوی و.
