په سویل کې د پکتیا ولایت مرکز ګردیز،احمد ابا او سیدکرم ولسوالیو کې وړمه ورځ سیلاوونو او ږلۍ شااوخوا۵ زرجریبه کرنیزې ځمکې او باغونه زیانمن کړي دي.
د مرکز ګردیز بالادې سیمې یو تن اوسېدونکی وايي:«زموږ سیمه کې شااوخوا دوه یا درې زره باغونه دي، د مڼو ، ګیلاسو،زردالو دا ټول ږلۍ وهلي، آن فصلونه لوبیا ، کچالو ، پیاز او بانجان یې وهلي، دا ټول خراب شول.»
د مرکز ګردیز بالادې سیمې یو تن اوسېدونکی وايي:« دا څه بالاده،چې ده،هر کور باغ لري،یوازې باغونه نه دي فصلونه هم ږلۍ وهلي دي.»
باغ لرونکي او بزګران وایي،سېلابونو او ږلۍ یې باغونه او فصلونه ډېر زیانمن کړي ، د کال خواري یې اوبو لاهو وړې او کرنې وزارت او مرستندویه بنسټونه دې ورسره مرسته وکړي.
د مرکز ګردیز بالادې سیمې یو تن اوسېدونکی وايي:« زموږ زیانونه دې براورد شي، له بزګرانو او باغ لرونکو سره دې مرسته وشي. دوی ته هېڅ هم نه دي ور پاتې، هر څه ږلۍ وهلي ، غنم او نور فصلونه یې هم زیانمن کړي دي.»
د مرکز ګردیز بالادې سیمې یو بل اوسېدونکی بیا وايي:« له کرنې ریاست غواړو،چې له موږ سره دې مرسته وکړي. روزګار نه شته دی. همدا باغونو ته پراته یو، د باغونو اوبه کولو لپاره ساعت په اووه سوه افغانۍ اخلو.»
اخوا د کرنې ریاست د کرنیزو چارو امر مومند خروټی بیا وايي،د تیرې ورځې سېلابونو او د ږلۍ له کبله شااوخوا ۵ زره جریبه کرنیزې ځمکې او باغونه زیانمن شوي دي.
خروټي زیاته کړه:«څلور زره جریبه ځمکه پورې باغونه د مڼو ، زردالو او همدا راز، غنم،جوار او لوبیا یې هم زیانمنه کړې ده.»
کرنې ریاست وايي،د سېلابونو او ږلۍ له کبله زیانمنو شویو سیمو ته د سروې ټیمونه استوي، له وزارت سره یې هم د زیانونونو په اړه راپور شریک کړی او له مرستندویه بنسټونو یې غوښتنه کړې،چې له بزګرانو او باغ لرونکو سره دې مرسته وکړي.
